Lufsuþankar

Þokkalegt partý í gær!!

2008-10-05T19:37:00.004Z

Hún Guðrún Elín litla frænka mín á 2ára afmæli í dag!! Til hamingju með daginn ljúfan.. Er hægt að vera meiri dúlla!!

Jæja er ekki vert að blogga eftir slíka helgi. Ég fór sem sagt í partý í gær klukkan 5 og þar voru saman komnar um 15 eða 16 kellur. Krissa var að halda partýið. Við byrjuðum á því að fara í ratleik sem Billi og Hafsteinn skipulögðu og það er ekki annað sagt en það hafi hlakkað í kvikindisskapnum í þeim þegar þeir voru að setja niður stöðvarnar. Við þeystum um allan bæ og út fyrir í brjáluðu roki. Á fyrstu stöð þá áttum við að skella í okkur staupi af Baccardi raspberry og það er nú bara helvíti gott.. þó það hafi verið drukkið dry. Ég hélt á vissum tímapunkti að ég væri að drepast. Rokið var svo mikið að ég náði varla andanum. En minn hópur var ekkert að gefa sig neitt og við rústuðum hinum. Lungun voru að springa þegar við komum heim til Krissu aftur. Shit! En svo var bara farið að hella í sig og spjalla og borða humarpasta, sem var geggjað gott. Og svo var bara partýstemmarinn komin á. Dansað og sungið við ABBA og svona eins og tíðkast í kvennapartýum. Um hálf átta voru sumar orðnar vel hressar en ég reyndi að hemja mig í drykkjunni og það tókst ágætlega. Var þó komin í gríðarlegt stuð um miðnætti þegar þrammað var á barin. Þar dansaði ég af mér rassgatið og var á dansgólfinu allt kvöldið, enda fékk ég að stjórna tónlistinni!! Var svo á leiðinni í eftirpartý eftir að barinn lokaði en guggnaði á því á miðri leið og dreif mig heim að sofa. Þurfti nú að fara í tölvuna aðeins áður en ég fór að sofa.. það er siður hjá mér! Í dag hef ég að mestu legið í bælinu með augun lokuð og gert ekki neitt... ekki einu sinni sofið. Meikaði samt að fara og ná í bílinn minn og dótið að öðru leiti er ég bara á náttfötunum að hafa það rólegt. Ég er ein heima og er í algjörri afslöppun. Langar svo suður um næstu helgi til að sækja Írisi vantar bara svo far! kemst suður en ekki til baka! ef einhver verður á ferðinni frá Egilsstöðum á sunnudagskvöldið endilega látið mig vita ef ég get fengið að sitja í .... eða bara ef einhver er að koma að sunnan og vantar félagsskap!!!! Jæja farin að horfa á imbann!! chao

Draumahúsið enn og aftur!

2008-09-24T23:56:00.003Z

Enn og aftur kem ég með þessa mynd! Mér finnst þetta bara svo flott hús að það hálfa væri nú nóg. Þetta er sem sagt tekið í Mjóafirðinum í einum af sumarrúntunum mínum,´múttu og Írisar.
Af mér er alveg fínt að frétta fyrir utan það að ég er með harðsperrur dauðans og ekki bara í einum vöðva nei í öllum helv.. skrokknum eftir blakæfingu á Fásk í gær. Ég,´Sóley og Guðný skelltum okkur á æfingu með fáskgellunum og þær hafa líka svona fínar upphitunaræfingar að dagurinn hjá mér í dag hefur verið hörmung. Hef mig ekkert getað beygt og það er alveg merkilegt að þegar maður er með harðsperrur í öllum fótleggjunum þá er maður aldrei eins duglegur að missa eitthvað í gólfið og vera eins og Gosi spýtustrákur (áður en hann breyttist í dreng) eða bara gamalmenni sem kveinkar sér líka svona við að beygja sig. En djö.. hafði ég gott af þessu. Væri svo til í að gera þetta svona tvisvar í viku, en það stendur samt ekki til. Við skreppum kannski einhverntímann aftur. Spurning um að fara að fá fólk hér á staðnum til að koma á æfingar. Framundan hjá mér er ekki mikið. Fer reyndar í skírn um helgina, á fríhelgi og ætla að reyna að gera aðeins meira þá helgi en ég gerði síðustu helgi; eyddi öllum sunnudeginum í að púsla. Við mútta erum með 3000 kubba dæmi á stofuborðinu og þegar maður hangir yfir þessu lengi þá fær maður alveg vöðvabólgu dauðans. En mikið er þetta nú afslappandi og skemmtilegt. Þessar útvöldu eru svona í og með að reyna að plana eina sumarbústaðarferð fyrir jólin. Það er nauðsynlegt að komast aðeins í burtu og sleppa af sér beislinu. Þarf að skreppa suður en hef ekki fundið mér tíma til þess ennþá. Brjálað að gera hjá minni! Jæja ég ætla að skríða í koju, kveðja Drabban

Er barnið farið að drekka!

2008-09-20T11:54:00.003Z

Nei nei hún er bara að halda á tómri dós!!

Það lýtur út fyrir að ég sé svona helgarbloggari. Það gerist ekkert nema um helgar. Það er svona þegar það er svo mikið að gera hjá mér. Ég er bæði á vöktum í vinnunni og svo er ég að læra á allt systemið og þar að leiðandi mikið niðri í búð utan vinnu. Það er marg sem fylgir þessu nýja starfi mínu en allt mjög áhugavert. Það er búið að vera svoldill gestagangur hér síðan um síðustu helgi. Alfa var hjá okkur frá föstudegi til þriðjudags.Þurfti reyndar að flýta fluginu sínu á þriðjudaginn vegna veðurs. Það var ömurlegt veður hér í síðustu viku. Það er búið að rigna eins og hellt úr fötu! Ég hélt kannski að það mundi duga til að bílinn minn yrði hreinn og fínn að utan en það dugði víst ekki til. Ég notaði því tækifærið í gær meðan það rigndi ekki og skellti mér í að þrífa hann utan sem innan. Ég hefði svo sannarlega getað verið á hlýrabolnum þar sem gula fíflið skein sínu skærasta en ég kunni nú ekki við það nágrannana vegna. Þrjóskaðist því við í flíspeysunni og hætti ekki fyrr en kagginn glansaði (eða svoleiðis). Guðrún Anna frænka átti afmæli í gær og ég kíkti til hennar eftir vinnu í gærkvöldi. Þar voru nokkrar skvísur samankomnar að úða í sig kræsingum. Ég stoppaði til að verða hálf eitt en þá var ég farin að geyspa svo mikið að ég kunni ekki við að láta þær horfa mikið lengur ofan í kokið á mér. Í dag er ég í fríi eða svo til. Fór með dósir úr búðinni og svo reikna ég með að taka bakvakt í kvöld ef þess þarf. Frí hjá mér er því eins og er ekki frí en þó það. Það var svo ömurlegt veður í morgun þegar ég vaknaði að ég sá ekki fram á að gera mikið af viti í dag, ekki utanhúss allavega. Ég var komin með þá grillu í hausinn að fara bara að taka til í geymslunni ( nú tístir sennilega í einhverjum) en ákvað að hlýfa öðrum á heimilinu við því. Mér finnst það snilldar not á tíma að taka til í geymslunni en ég er nú samt tiltölulega nýbúin að því. Ég býst því við að reyna að vinna eitthvað í tölvunni í dag í staðinn. Það er svo ótrúlega margt sem ég ætla að koma á tölvutækt form sem tilheyrir búðinni sem ekki hefur verið það hingað til. Mamma er svo ótölvuvædd að það er nánast ekkert gert í tölvu utan bókhalds. Það hefur ekki einu sinni verið nettenging í versluninni hingað til en það stendur til bóta. Líka nauðsynlegt upp á framtíðina svo við Helga getum gengið að bókhaldinu vísu þar en ekki hér í kjallaranum. Þetta kemur allt með tímanum. Það er hellingur sem þarf að gera og þarfnast skipulags og tíma. Þetta fer hægt af stað en við reynum að gera eitthvað smá annað slagið. Ég á nú kannski eftir að fara úteftir í dag og mála smá , alltaf þörf á því! Kannski í kvöld þá ætlar Helga að fá gistingu í gestaherberginu þar sem hennar hús er fullt af gestum sem eru komnir til að taka skúrk í húsinu hennar. Ef hún gistir þá getur vel verið að ég bjóði henni upp á hvítvín. Það hafa komið spurningar um það úti í bæ hvort við séum lessur! hehe gamall kall sem er að vinna hér sem var víst að spurja að því úti í bæ. Okkur finnst þetta nú bara fyndið. Við erum jú mjög mikið saman en bara sem vinkonur, svo það sé nú á hreinu!! Ég man ekki hvort ég var búin að segja frá því að við (ég,Helga, Íris og Ágústa) fórum á kvennaráðstefnu á Höfn síðasta þriðjudag. Þetta var fyrir konur í atvinnureksti og þetta var mjög skemmtilegt og nytsamlegt. Eftir þetta ákváðum við að vera svoldið grand á því og fórum á Humarhöfnina og fengum okkur að borða. Ég fékk mér humarsúpu í forrétt og svo humarpizzu í aðalrétt og hún var rosalega góð! ég mæli með því að allir drífi sig á Höfn og fari á Humarhöfnina svona áður en hún lokar, það lokar 1 október og er lokað fram á vor. Alls ekki dýr staður og hrikalega kósí bara. Við fórum alsælar og saddar heim eftir daginn. Jæja ætli ég fari ekki að bardúsa eitthvað sniðugt. Kveðja og góða helgi Drabban

p.s varð að láta þetta fylgja

Helgarfrí!

2008-09-14T21:16:00.003Z

Já þið segið! ekki er nú hægt að gefa mér háa einkun fyrir nýja innkomu á bloggið!
En þessi meðfylgjandi mynd sem ég skellti með mætti kalla Kokkur án klæða! fannst bara svo tilvalið að setja þessa mynd inn þar sem helgin hjá mér er búin að snúast um að borða eða svoleiðis. Alfa systir kom til okkar á föstudaginn. Við mæðgur sóttum hana á Egilsstaði á föstudaginn og ég notaði tækifærið og skellti mér í klippingu. Fór að vinna á föstudaginn klukkan 4, var búin um 11 og fór þá beint heim í smá stund en kíkti svo í Löngubúðina þar sem var boðið upp á osta og hvítvín
ég fékk mér eitt glas af hvítvíni og spjallaði við skvísurnar og fór svo heim. Fór í sund á laugardaginn, chillaði með múttu, Ölfu og Írisi þar sem ég var i fríi. Kíktum á afa sem er komin heim (eða á Helgarfell) eftir langa fjarveru vegna veikinda. Spiluðum Scrabble og höfðum það bara rosalega gott á laugardeginum. Í dag hefur svo sem ekki margt verið brasað nema bara haft það enn betra. Við erum búnar að borða rosa góðann mat og heimabakað brauð og svo að sjálfsögðu nammi. Fengum okkur smá hvítvín/rauðvín með matnum á laugardaginn. Alfa verður hér fram á þriðjudag, er að klára sumarfrí. Á þriðjudaginn er ég að fara á Höfn ásamt nokkurm gellum héðan og við erum að fara á eitthvað kvennaþing fyrir konur í atvinnurekstri sem mig hlakkar mikið til að fara á. Alveg nýtt fyrir mér að fara á eitthvað svona. Vonandi að þetta eigi eftir að koma að góðum notum. Annars er ekki mikið plan framundan hjá mér.. annað en vinna borða sofa. Sem er fínt. Jú jú ég hugsa líka um krílið mitt. Hún hefur nú yfirleitt alla athyglina sú dama, og oft meira en hún getur. Það getur verið erfitt fyrir okkur múttu stundum að reyna að tala saman án þess að hún sé að reyna að troða sér inn í samræðurnar. Það er víst svona þegar maður er eini krakkinn á heimilinu. Hún sagði nú við mig frekar skondið þegar við vorum á leiðinni upp á Egilsstaði á föstudaginn. Við vorum að keyra Skriðdalinn og íris segist vera svo þyrst og svöng ég rétti henni vatnsflösku og segi ,,fáðu þér vatn núna og svo færðu að borða þegar við komum". Hún svarar mjög fljótt,, nei mig lagar ekki í vatn. Mig langar svo í mjólk... úr brjóstunum á þér mamma!!". Ég sagði nú að það væri ekki hægt. Þá sagði hún jú jú við förum bara á sjoppuna og inn á klósett og læsum. svo sest þú á klósettið með mig í fanginu og gefur mér að drekka!. Ég útskýrði það því fyrir henni að ástæðan væri ekki sú að það væri ekki hægt í bílnum heldur væri engin mjólk í brjóstunum á mér. Mér fannst svoldið skondið að hún segði þetta þar sem hún hætti sjálf á brjósti þegar hún var 5 mánaða!. En svona hluti lætur hún óspart út úr sér. Gaman að þessu engu að síður! En jæja þetta var nú bara svona stutt ágrip af því sem ég hef verið að gera utan vinnu sem hefur verið flest kvöld síðustu tvær vikur! verð næstu tvær á fyrrpartsvöktum svo ég reyni.. ég endurtek reyni að vera dugleg að þvæla eitthvað hér inn. Lofa engu. Kveðja Drabban

Áskorun frá Írisi Dögg

2008-09-08T22:48:00.004Z

Draumahúsið mitt fundið í Mjóafirðinum

Minnsta bensínstöð á landinu sennilega bara!

Bara cool skilti í Eskifirðinum

Jæja ég fékk víst áskorun frá Írisi Dögg um að fara að blogga aftur. Andinn hefur svo sem ekki komið yfir mig aftur en ég get nú ekki verið minni manneskja en það að taka áskoruninni. Ég á nú samt aldrei eftir að komast með tærnar þar sem hún hefur hælana í blogginu. Ótrúlegt miðað við að hún segist hanga heima hjá sér alla daga en samt hefur hún endalaust hugmyndir af bloggi! Ég ætti nú samt að geta núna, þar sem ég er komin í nýju vinnuna, þar sem ég hitti fólk daglega að geta sankað að mér kannski einhverjum kræsandi kjaftasögum! Ég byrjaði sem sagt í nýju vinnunni sem framkvæmdastjóri (ásamt Helgu vinkonu) í versluninni Við Voginn. Tókum við af mömmu sem er að hætta eftir eitthvað um 20 ár. Nú ætlar hún að fara að chilla bara, er nú þegar á leiðinni til Finnlands í kvennaferð og svo á tónleika með Queen í London. Ekki annað sagt en hún sé að fara að hafa það gott í þessu fríi sínu sem enginn,ekki einu sinni hún veit hvað á að vara lengi. Mottóið hennar er að njóta bara lífsins núna og hugsa bara um sjálfa sig. Enda kominn tími til. Ég dauðöfunda hana á þessum tónleikum sem hún er að fara á. Ég hlýt einn daginn að hafa efni á því að gera mér glaðan dag eða daga og skreppa eitthvað erlendis á tónleika. Veit um nokkra sem eru að fara á Madonnu´tónleika.. efast ekki um að það verði upplifun. Kannski ég geri bara eins og mamma. Vinni eins og brjálæðingur í 20 ár og fara svo bara að chilla og vinna ekki neitt. Mamma byrjaði með þessa verslun 34 ára og nú er ég 31 árs og hlakka til þegar ég verð 50 og eitthvað eins og mamma og geta farið að njóta lífsins aftur. Ég er rosa ánægð að vera komin í verslunina að vinna. Svoldið mikil viðbrigði að vera á röltinu að gera eitthvað allann daginn heldur en að sitja á stól eða í sófa mest allann daginn eins og ég gerði í leikskólanum, enda er ég svo þreytt í fótunum að það 1/2 væri nóg. En það er vont en það venst og ég er minnst að væla yfir því þar sem ég hef svo gaman að því að vinna við það sem ég get verið að hreyfa mig svoldið, svo við tölum nú ekki um hvað ég hef gott af því!! Framunda hjá okkur Helgu er mikil vinna við að læra á allt klabbið, bókhald, pantanir, launaútreikninga og allt það sem fylgir þessu. Ég er svo sem búin að vera að vinna þarna annað slagið í svona 15 ár en aldrei komið nálægt neinu sem heitir ábyrgð eða svoleiðis. Gaman að takast á við þetta!!
Það er svo langt síðan ég bloggaði síðast, sennilega ekki síðan ég og Íris Antonía fórum í ferðalag,sem var by the way ótrúlega skemmtilegt. Ég elska að keyra um landið og skoða fallegu náttúruna sem við megum vera stolt af hér á landinu!! Ég á margt eftir að skoða enn hef allann tíma í heimi til að klára það. Íris er búin að vera voða mikið hjá pabba sínum og c.o undanfarið og ég hef reynt að nýta þann tíma fyrir mig. Ekki samt að ég hafi drullast til að nota hlaupabrettið sem ég á alltaf í bílskúrnum. En trúið mér ég hugsa um það á hverjum degi! Það dugir samt ekki til til að ná af sér eins og nokkrum aukakílóum! En hver nennir að vera að spá í línurnar. Ég hef línur þó svo að þær séu nokkuð ójafnar:). Jæja mætti ekki segja sé að þetta sé nokkuð nóg röfl svona í byrjun á nýju bloggeldi. Læt hér með "pennann" frá mér og ætla að henda mér í "koju" . Over and Out Drabban

2008-08-14T01:08:00.000Z

Sumarfrí! on the way!

2008-07-08T22:41:00.003Z

Nú eru ekki nema 3 dagar þar til hið langþráða sumarfrí hjá mér byrjar!!! ég get varla beðið. Batteríið alveg búið. Ég er búin að leggja mig held ég á hverjum degi núna í að verða viku og ég er alveg að sofa 1-3 tíma og fer svo bara á mjög skikkanlegum tíma að sofa á kvöldin. Planið er að fara eitthvað með nýja tjaldið sem ég var að kaupa í dag (eða mamma keypti fyrir mig á Egilsstöðum) planið að fara allavega í Dimmuborgir, fara á Snæfellsnesið og svo langar mig svo að kíkja í heimsókn til Berglindar, Birkis og Emelíu í sveitina en ég á eftir að boða komu mína þangað ef þau mega vera að þvi að taka á móti okku mæðgum og kannski Ölfu systur líka. Ég ætla að reyna að plata Helgu vinkonu með mér eitthvað í smá útilegu . Ótrúlegt að hugsa til þess að vera að fara í mánaðarfrí og hanga ekki með henni alla daga eins og við gerum. við vinnum jú saman, við höngum saman slatta utan vinnu og erum svo að fara að taka við nýja jobbinu saman! ég verð nú að hafa hana með mér í smá frí! Hehe við hlægjum stundum af því að þegar við hittum börn af deildinni okkar utan vinnutíma þá spyr það alltaf um hina. Eins og við séum bara alltaf saman! Íris mín spurði mig líka um daginn agalega alvarleg hvort hún Helga mætti ekki bara líka vera mamma sín. hún ætti hvort sem er engin börn. Naumast hugulsemin í henni. Veit ekki hvort Helga mundi samt treysta sér í svona gemling eins og ÍRisi því hún er svoooooo uppfull af orku og óþekkt eins og er. Hún þarf svo að komast í sumarfrí!! Um helgina verður ættarmót hér og við eigum vona á held ég 6 gestum í gistingu. það verður því munur á heimilislífinu hér. Það verður trúbbi í löngubúðinni á föstudagskvöldið og þá ætla ég að kíkja út og vonandi með eitthvað af þessum snillingum sem eru að koma um helgina. Nefnum engin nöfn en þetta lið kann að skemmta sér. Spurning um að fá sér einn Mojito svona til að nota myntuplöntuna sem ég fékk í afmælisgjöf frá Auði. Akkúrat svona lauf sem maður notar í Mojito! Það verður eflaust glimrandi stuð alla helgina þannig að kannski ég hafi frá einhverju að segja í næstu viku ef svo vill til að ég taki fram tölvuna til að blogga! ég ætla að koma mér út fyrir rörahliðið sem fyst í næstu viku svo ég lofa engu! ekki þekkt fyrir að lofa neinum bloggi, enda er ég mest hrædd um að flestir séu hættir að líta hér inn þar sem ég er svo léleg í þessu! En nú ætla ég að koma mér í háttinn. Má ekki missa úr beautysleepinu mínu. Segi bara snemmkomið góða helgi og sumarfrí kveðja Drabban

Trallalalalala!

2008-06-22T01:19:00.004Z

Jæja blogga hvað? ekki alveg að nenna þessu þessa dagana. Reyni að gera eitthvað meira af viti eins og að bera í pallinn, slá, skipuleggja nýju vinnuna, hanga úti með vinkonum, eða bara allta annað en hanga í tölvunni eins og ég hef verið allt of duglega við í vetur. Það sem hefur gerst í mínu lífi undanfarið er ekki mikið fyrir utan það að ég er ekki lengur 30 ára, heldur varð ég 31 árs á fimmtudaginn. Merkilegt hvað ég er hætt að fá kvíðaköst fyrir afmælin mín eftir að ég hætti að vera 20 og eitthvað. Það að verða 30 var svakalegt en ég var svo chilluð fyrir þetta afmæli. Henti í eina köku og svona og bauð nánast engum í kaffi. Það komu þó einhverjir og það var ljómandi gaman. Mér fannst algjör snilld að ég fékk frá Ævari frænda mínum skopparakringlu sem var bara fyndið því fyrir svona 29 árum þá fékk hann svona skopparakringlu í jólagjöf og þegar ég kom í heimsókn (um 2ára) þá reif ég hana af honum og lék mér með hana eins og ég ætti hana. Ég var svo mikið stærri og sterkari (þá allavega, veit ekki með núna) hann var svo fúll og í öll þessi ár þá hefur hann alltaf verið að minnast á þetta og verið (innst inni) enn fúll við mig yfir að hafa rifið af honum. Þannig að núna á ég mína eigin skopparakringlu og ég er sko búin að bjóða Ævari (Omsa) frænda að koma og fá að prófa mína án þess að rífa hana af honum. Þetta er svona meira persónulegur húmor en mér finnst þetta bara fyndið. Framundan hjá mér er svo bara að telja niður í sumarfrí, reyna að gera eitthvað skemmtilegt í því. Telja niður dagana í nýju vinnuna mína. Reyna að njóta lífsins og vera hress og kát, sem gegnur ótrúlega vel eitthvað þessa dagana. Ég er svo ánægð með myndavélina mína að ég er alltaf að plana að labba hingað og þangað til að fara að taka myndir. Erfiðara að drullast af stað og fara en ég er á leiðinni! Búin að sitja óvenjulega mikið á svölunum undanfarið, sleikt sólina sem samt hefur ekki skilið eftir sig nein ummerki um það í andlitinu á mér frekar en öðrum hlutum líkamans. Ég bara verð ekki brún! Jæja það er um að gera að koma sér í svefn. Þreytt, enda búin að drekka smá hvítvín í kvöld með Helgu og Írisi og spjalla, ótrúlega næs að fara og hitta þær. Klukkan að verða 2 um nótt og ég orðin svaka þreytt. Fór í sund í morgun, fór í skógræktina á skógardaginn og er svo þreytt. Góða nótt alle sammen!! kveðja Drabban

Búin að ráða mig í aðra vinnu!!

2008-06-02T22:53:00.004Z

Ætli það sé ekki kominn tími á smá blogg hér! Ég hef nú lítið gerts síðan ég kom að utan fyrir utan það að segja upp vinnunni á leikskólanum, búin að vera á leiðinni til þess síðan desember 2005 en þar sem mér hefur ekki staðið nein betri vinna til boða þá hef ég strögglað þarna í tæp 3 ár. Ástæðan fyrir því að ég er búin að segja upp er sú að þar sem mamma er búin að segja upp sem framkvæmdastjóri í sinni eigin verslun, og starfið hennar var auglýst en enginn sótti um nema ég og Helga vinkona í sameiningu þá vorum við ráðnar og erum sem sagt að taka við 1.september. Við erum reyndar byrjaðar að skipta okkur af,en þó með góðu samþykki hinna og erum strax búnar að knýja fram smá breytingar og erum með nokkrar þrælsniðugar hugmyndir sem við eigum eftir að koma á síðar og verða ekki gefnar upp strax. Mamma var svo fegin þegar við sóttum um bæði vegna þess að hún vill losna út og var ekki að sjá það gerast meðan enginn sótti um en svo þegar við fengum þessa snilldar hugmynd og bárum hana upp við múttu þá leist henni svo vel á. Maður er aldeilis búin að fá hamingjuóskir og meira að segja knús og kossa frá fólki sem líst svona dæmalaust vel á að við Helga tökum við þessu. Nú getum við varla beðið eftir að taka við þessu. VIð erum samt alveg sammála um það að við eigum svo eftir að sakna krakkanna okkar á leikskólanum. Það er alveg yndislegt að vinna með börnum en það er svo illa borgað að það hálfa væri nóg. Framundan hjá okkur er að læra ýmislegt nýtt eins og að reikna út laun og allskins launavinna sem maður hefur aldrei komið nálægt. Ég hef nú sem betur fer talsverða reynslu á ýmsu þarna í versluninni þannig að ég er ekki alveg að æða út í eitthvað nýtt. Það er bara bókhaldið sem ég kann ekki. Það er búið að vera rosalega gott veður hér fyrir austan undanfarið en einhverra hluta vegna þá fæ ég alveg afskaplega lítinn lit! Hundsvekkt yfir því en það á nú kannski eitthvað eftir að ráðast úr því þar sem sumarið er jú rétt að byrja. Það er nú samt sorglegt hvað það er oft þoka hér á sumrin en hún er ekki enn farin að láta sjá sig. Plönin mín um sumarfríið mitt dóu þegar mér var tilkinnt að ég fengi ekki sumarbústaðinn sem ég sótti um í Grundafirðinum. Það er ættarmót hér 11-13 júlí sem ég verð auðvitað á en annað er óplanað. Ég veit það bara að ég ætla að gera eitthvað skemmtilegt en ódýrt þar sem ég er skít blönk eftir ferðina til New York og svo var ég líka að kaupa mér felgur, geislaspilara svona í bílinn og stefni að þvi að fara á stutt ljósmyndanámskeið eftir nokkra daga til að læra á nýju vélina mína. þarf reyndar annaðhvort að fara á Höfn eða Egilsstaði til þess en þetta er spurningin um að hóa saman liði í einn bíl og deila bensínkostnaði. Jæja best að fara að sofa. Þarf víst að ná upp svefni eftir sjómannadagshelgina, maður fór víst á djammið þar sem loksins var eitthvað um að vera hér. Birna Sif dóttir Snæbjörns (og ein af keppendunum úr Bandinu hans Bubba) var að spila ásamt hljómsveit. Þrusu stemmari og ég dansaði og dansaði! Fór í eftirpartý og alles eftir að hafa horft á létt slagsmál, eitthvað sem gerist aldrei hér!!!! Alvöru sjómannadagsstemmari og fínt! Nætí næt!!! kveðja Drabban

New York!

2008-05-19T20:15:00.011Z

Einhverra hluta vegna komu myndirnar allar í öfugri röð!
Fengið sér næringu á flugvellinum í New York eftir snilldar ferð

Hildur þreytta eftir nuddið

Frelsisstyttan fræga

Gellurnar í verslunarleiðangri

Íris og Æsa

Íris, Matta og Ásdís á Sushi staðnum

Beðið eftir að fara í útsýnissiglingu

Manhattan

Flogið um loftin blá

Empire state

Dagný, Sigurbjörg og Ég á sushistaðnum

Þá er maður búin að skreppa í stelpuferð til New York með 11 gellum úr menntó. það var svoooooo gaman. Fyndið nokk að aðstoðarflugmaður í ferðinni var jafnaldri okkar úr menntó. Við létum hann svo sannarlega vita af okkur og honum fannst þetta bara fyndin tilviljun. Við gistum á rosa fínu hóteli, borðuðum rosaflott 3 kvöldin og ferðuðumst með limmu fram og til baka eitt kvöldið. Það er ekki hægt að segja að það hafi mikið verið djammað enda ekki planað þannig séð en sumar kíktu á staði en ÉG fór með þeim fyrstu heim öll kvöldin. Það er vitað mál að hjá mér fer áfengi og að vakna snemma og gera eitthvað ekki saman. Ég tók því verslanirnar og endalausa göngu fram yfir djammið. Verslaði smá en engin ósköp. Fórum í útsýnissiglingu og sáum allt það helsta eins og Frelsisstyttuna og svona. Ætluðum svo að skoða eftirmerki tvíburaturnana en það var búið að loka það allt af þar sem þar eru miklar framkvæmdir í gangi þar sem verið er að fara að byggja aðra byggingu þar. Fórum á röltið í Soho þar sem nóg er af búðum. Ég var svo dauð í fótunum eftir allt labbið að þegar við komum á flugvöllinn í New York þá var þar nuddstofa og ég og ein skelltum okkur í nudd. Ég fékk að sitja í nuddstól í svona 20 mínútur og keypti mér svo fótanudd og það var bara geðveikt!!! Hefði svo getað lagt mig í 2 tíma meðan gaurinn nuddaði mig! Mæli með þessu ef einhver er á ferðinni þangað. Ég ætlaði að kaupa mér geislaspilara í bílinn úti, og þá Kenwood en það var bara engin verslun með slíkt! Endað því á að kaupa mér Panasonic spilara í fríhöfninni. Var einn og hálfa dag í bænum eftir að ég kom heim. Keypti mér nýjar álfelgur undir bílinn ( þær einu sem til voru á höfuðborgasvæðinu í 15" undir Subaru), dekk og er nú komin á ný dekk og felgur en vantar ískyggilega einhvern til að tengja fyrir mig spilarann í bílinn og hátalarana svo ég geti farið að gellast. Það er svo hellingur að gerast hjá mér á næstunni, nenni ekki að segja frá því núna. Lét nokkrar myndir fljóta með úr ferðinni. Eg var svo sem minnst með myndavélina á lofti og á eftir að fá copys frá stelpunum. Ég týmdi nefninlega ekki að fara með nýju vélina með mér, enda sjálfsagt gefist fljótt upp á að dröslast með hana í búðir! Kveðja Dröfn

2008-05-05T19:56:00.006Z

Þá er hin árlega Hammondhátið liðin!
Á fimmtudaginn brunuðum við Júlla á Egilsstaði til að sækja Snædísi og Selmu Líf sem voru að koma í heimsókn. Snædís var að koma í boði okkar stelpnanna þar sem við gáfum henni flugmiða fram og til baka þegar við kvöddum hana þegar hún flutti héðan. Þar sem hún fékk ekki barnapíu fyrir sunnan þá tók hún litlu skvísuna með og þær gistu hjá mér. Við vorum komnar á Djúbban rúmlega 3 og þá var farið til Helgu og hitt allt liðið. Hjá henni voru komnar tvær vinkonur í heimsókn og við hinar hrúguðumst þangað líka. Svo var farið á kínahlaðborð í Við Voginn og troðið í sig. Við fórum svo allar snemma að sofa (ég vakti þó lengst). Á föstudaginn þurfti ég svo að vinna en Snæsan og Selman skruppu í heimsóknir hingar og þangað og svo þegar ég var búin að vinna fórum við aðeins á rúntinn, í mjólkurbúðina og svo heim að koma gríslingunum í háttinn. Við kíktum svo á Helguna í heimsókn og kíktum aðeins á hótelið. Svo var bara farið heim að sofa. Vöknuðum allt of snemma á laugardagsmorguninn (miðað við hvað við fórum seint að sofa) og vorum komnar í sjoppuna á mínútunni 11 til að fá okkur "þynnku"borgara. Rúntuðum svo og fórum svo heim að gera klárt fyrir kvöldið. Um kvöldið var svo grillpartý í Hvoli. Buðum nokkrum vinum í heimsókn þar sem við tróðum í okkur dýrindin grillmat og meðlæti. Drukkum flest léttvín með og komum okkur í stuð fyrir kvöldið en það var farið á hótelið að horfa á Samma og stórbandið hans. Heil 18 manna hljómsveit. Það var svaka stuð. Flott dæmi og svo tók við djamm og partý og það var komið mjöööööggg seint heim. Dagurinn í gær fór að mestu í að sofa og vera slöpp. Reyndi eins og ég gat í dag að ganga frá sem mestu, þvo þvott til að hafa eitthvað hreint með til New York enda fer ég í þá ferð á fimmtudaginn. Stefni að því að keyra suður eftir vinnu á miðvikudaginn og flýg út á fimmtudag! ég er orðin frekar spennt. Hefði viljað eyða aðeins minna á barnum um helgina en það þýðir víst ekki að tala um það! Ég tek Vísa vin minn með í ferðina og það á sennilega eftir að bjarga málunum ef ég kemst í verslunarstuð sem ég á mjög auðvelt með! Ég verð að reyna að pakka niður í kvöld og á morgun, lítill tími til þar sem ég þarf að fara á starfsmannafund eftir vinnu á morgun. Jæja nóg í dag. Kveðja Drabban
Meðfylgjandi myndir eru af matargestunum síðan á laugardaginn.

Gleðilegt sumar

2008-04-27T21:00:00.005Z

Gleðilegt sumar!!
Ég hélt svo sannarlega um daginn að sumarið væri komið með stæl þegar hér var sól og hiti í nokkra daga í röð og allir úti í garði að brasa eða þrífa bílana hátt og lágt. Ég gerði að sjálfsögðu bæði. Klippti runnana eins og brjálæðingur, þreif bílinn hátt og lágt og tók niður síðustu jólaseríuna sem ég hafði víst gleymt
i einum runnanum. Á föstudaginn þá fékk ég stóran pakka í pósti. Nýtt hlaupabretti þar sem hitt er búið að vera bilað í 5 mánuði og auk þess þá virkaði það aldrei almennilega. Var kannski búin að nota það í 4 klukkutíma þegar það dó! en nýja brettið lítur vel út. Ég var rosa bjartsýn á föstudagskvöldið og ákvað að prófa græjuna sem ég var búin að koma fyrir í bílskúrnum. Tegndi hátalara og bassabox alveg við brettið og tengdi ipodinn, byrjaði svo að labba svaka rösklega og taka smá skokk inn á milli. Ákvað að vera í svona hálftíma til að byrja með. En þar sem ég var með svo agalega hressa music eða það sem mundi flokkast undir píkupopp á háustigi þá bara gat ég ekki hætt og hélt áfram í klukkutíma rúmann. Var þá komin með störu af þreytu og ákvað að hætta áður en ég sofnaði og mundi slasa mig á brettinu! Kæmi svo sem ekkert á óvart að mér tækist það. Eins og kannski einhverjir muna þá tókst mér svo sannarlega að slasa mig á hinu brettinu í byrjun og var heppin að missa ekki 3 fingur! En vonandi er óheppnin hætt að fylgja mér og ég get farið að hreyfa mig. Það átti að sjálfsögðu að vera farin nokku aukakíló fyrir löngu eða síðan ég keypti hitt brettið en það hefur að sjálfsögðu ekki gerst þar sem það hefur verið bilað meira og minna. Þar sem ég tók svo vel á því á á föstudagskvöldið þá hafa harðsperrur og bakverkir orðið til þess að ég hef ekki getað farið á brettið í gær og í dag! byrjar vel. En ég er nú að liðkast aðeins eftir sjóðandi heitt bað í dag og ætti að geta gert eitthvað á morgun. Spurning um að fara hægar af stað og ná upp þoli í stað þess að gera út af mig strax. Í gærkvöld dró ég Auði og Ævar frænda með mér í Löngubúðina til að spjalla bara. Fengum okkur nú bara Pepsí og sátum í tvo tíma. Það var rosa næs hjá okkur. Það er svo ótrúlegt að maður skuli ekki vera duglegri að fara og heimsækja fólk hér á staðnum. Það er ekki eins og það taki neinn hálftíma að fara á milli. Þetta er svo mikill aumingjaskapur í mér að vera ekki duglegri að það hálfa væri nóg! En ég hef verið duglegri en síðustu ár. Í dag drifum við mæðgur okkur í að byrja að mála eldhúsið. Það verður tekin seinni umferð á morgun. Annað sem ég afrekaði um helgina er að ég tók að sjálfsögðu geymsluna og bílskúrinn í gegn. Það eru merki um að sumarið sé að koma þegar ég byrja á því. Tek hvort tveggja í gegn nokkrum sinnum á sumri og endurskipulegg!!!! Og hef svoooooo gaman að. Það er eitt sem ég hef ekki verið ánægð með undanfarið. Það er það að ég hef verið að vakna við hundagelt og hundaýlfur í nýja hundi nágrannans fyrir klukkan hálf átta á morgnana!!! ég verð bara pirruð!!!! Og um helgina var sama sagan!!! Hvenær fær maður að sofa út!!!! Ég er ekki mikill hundavinur og hef aldrei skilið þessa áráttu að eiga hunda eða ketti. Við hliðina eru komnir 2 hundar mér til mikils ama. Ég er samt ekki að vera neinn leiðindar nágranni og kvarta og kveina í nágrönunum. En ég vil fá að sofa á morgnana!! Jæja nóg í bili... Kveðja Drabban
p.s meðfylgjandi mynd er tekin á Öxinni um síðustu helgi. Þá var hún opnuð og ég brunaði hana og sótti múttu á Egilsstaði. Fékk stimpilin glanni frá konu héðan sem ég tók fram úr á leiðinni! fannst það bara hrós. En nógur er snjórinn þarna enn og bara gaman að keyra þarna.

Ég á slatta eftir ef einhver hefur áhuga

2008-04-17T14:54:00.006Z

Ef einhvern vantar hálsmen,eyrnalokka eða armbönd þá á ég enn eftir slatta til sölu. Bara koma og skoða. Myndirnar eru bara sýnishorn,, sjón er sögu ríkari!,,
Kveðja Drabban

Endalaus veikindi hér á heimilinu

2008-04-16T14:54:00.003Z

Iss! ég fæ nú ekki mörg stig fyrir að vera dugleg að blogga! en svona er þetta nú bara, mig vantar innblástur í bloggið. Netið hjá mér hefur verið ótrulega leiðinlegt undanfarið, ég dett stöðugt út og þarf endalaust að vera að endurstarta routernum. Ég held að málið sé að ég er búin að vera svoldið húkt á facebook og síðan mín var orðin svoldið full af allskyns dóti eins og myndböndum og áframsendum pósti. Ég tók mig því til í gær og henti nánast öllu slíku út og ég held svei mér að netið sé búið að haldast inni síðan. Við mæðgur erum heima í dag, í gær og á morgun vegna veikinda ungans. Hún er svo kvefuð og slöpp en hitalaus. Tók upp á því í morgun að æla í 4 klukkustundir. Það hefur lítið verið gert þó maður sé heima. Nánast þurft að liggja uppi í rúmi með skvísunni og þjónustað hana út í eitt. Hún finnur svo fyrir því að amman er ekki heima til að vorkenna henni líka. Hún er vön því að fá tvöfalda vorkun en þar sem mamma er fyrir sunnan þá er það bara ég sem er að stjana við hana í veikindunum. En það er svo sem ekkert að því að gera ekki neitt og hanga bara heima. Maður slakar þá alla vega vel á og hleður batteríð þó útivera sé kannski eitthvað sem manni langar mikið í núna. Það hefur ekkert spennandi gerst í lífi mínu undanfarið sem vert er að blogga um. Nú fer bara að styttast í að ég fari til New York með stelpunum úr menntó. Það verður feikna stuð, komin dagskrá og mér líst þrusuvel á. Gott þegar einhver annar nennir að skipuleggja fyrir mann. Eina sem ég sá að planinu var að það er verslunarferð daginn eftir djammið og þeir sem þekkja mig vita það að ég er ekki mikil manneskja daginn eftir kvöldið áður svo það er annaðhvort fyrir mig að taka á djamminu og versla kannski ekki neitt eða þá að vera afar róleg á djamminu og geta verslað því um meir. Ég bíst nú alveg við því að ég taki búðirnar fram yfir djammið. Held mig bara með einni sem er ólétt og verður því sennilega í óáfengu drykkjunum. Fínt ef maður er ekki sú eina sem er ekki að sötra. Að öðru þá var ég loksins að fá mótorinn í hlaupabrettið, búin að bíða í 4 mánuði. Fékk rafvirkjann í fyrradag til að henda honum í svo ég gæti farið að byrja að hreyfa mig. en nei nei um leið og brettið fór í gang heyrðist hvellur og það gaus upp einhver úrbræðslulykt og þá dó einhver annar hlutur í því!!!! ég var svo ekki ánægð. Ef ég þarf að bíða eftir að þetta blessaða bretti fari að fara í gang þá er það á hreinu að ég skila því og heimta endurgreitt!!!! ég er búin að fá nóg af þessu. Mér er greinilega ekki ætlað að ná af mér þessum helv... aukakílóum. Ég þarf eiginlega að fara að gera eitthvað í mínum málum því ég er svoldið tæp á að fá sykursýki samkvæmt síðustu blóðprufu. Þarf svo að passa mig á því hvað ég borða og þarf að fara að hreyfa mig. Ég er ekki spennt fyrir því að fara í íþróttahúsið því þar snúa brettin bæði upp að hvítum veggnum og ekki neitt til að horfa á eða lesa. Bara snjóhvítur veggurinn. Ég er ekki heldur spennt fyrir því að vera þar þegar einhver er þar sem ekki er að hlusta á sína tónlist. Eða þegar ég þarf að hlusta á dægurmálaútvarpið! Já það vantar svoldið að gera þennan tækjasal hér í íþróttahúsinu meira aðlaðandi. Jæja nóg af voli í dag. Kveðja Drabban

Leti helgi!

2008-04-04T19:48:00.005Z

Hellú! Ég veit að síðasta færsla var ekki skemmtileg en ég var bara í svo vondu skapi að ég þurfti bara útrás. Núna er ég búin að fá gleði mína á ný. Ætla svo að chilla þessa helgina. Ekkert djamm og rugl heldur heimahangs, tölvan, tónlist og sjónvarpið. Ég er enn barnlaus og verð það fram yfir helgina. Talaði við skvísuna áðan og þá var hún sko í Kópavogi og nýkomin úr bíó. Henni þykir voða flott að hafa frá einhverju svona að segja. Ég sakna hennar voða mikið þegar hún er ekki hér en ég reyni líka að gera eitthvað fyrir sjálfa mig og slaka eins mikið á og ég get. Ekki geri ég ráð fyrir því að vera mikið utanhús þessa helgina enda heldur áfram að snjóa hér og ég (og fleiri) búin að fá upp í kok á þessum endalausa snjó. Ég er búin að þrjóskast við í allan vetur að setja ekki vetrardekkin undir og hugsa alltaf það tekur sig ekki úr þessu en svei mér að það hefði sko borgað sig frá upphafi vetrar eða c.a í okt/nóv. En kagginn kemst allt innanbæjar svo ég kvarta ekki. Það eina sem ég kvarta yfir þessa dagana er hárið á mér!! Nú hef ég ekki farið í klippingu svoooo lengi enda að reyna að þrjóskast við að safna hári til að fá mér klippingu sem ég þarf ekki að halda við í hverjum mánuði. Aðeins að hvíla mig á stutta hárinu og fá mér sítt!. Ég væri löngu búin að fara í klippingu á Egilsstaði ef það væri ekki svona leiðinlegt veður alltaf og svo kemst ég bara á laugardögum en hef ekki komist samt. Nú er það því bara hárbandið til að halda lubbanum frá andlitinu. Jæja, það er best að vera ekki að blogga meira um ekki neitt! þurfti bara að skrifa eitthvað af skildurækni. Góða helgi alle sammen kveðja Drabban

Þetta var svo sem vitað mál!!

2008-04-01T17:08:00.002Z

Þetta var á mbl.is í dag og ég varð bara að láta þetta fljóta hér!!

Greina ekki á milli vinsemdar og daðurs

Karlar gera almennt ekki greinarmun á almennri vinsemd kvenna og daðri, samkvæmt niðurstöðum nýrrar bandarískrar könnunar. Þetta kemur fram á fréttavef Jyllands-Posten.

Fram kemur í könnuninni, sem unnin var á vegum háskólans í Indiana, að það gildi einu hvort konur horfi brosandi beint í augu karla eða leggi hönd á læri þeirra. Flestir þeirra geti hreinlega ekki greint á milli vinsemdar kvenna og daðurs.

Könnunin var gerð með þeim hætti að fylgst var með 280 námsmönnum af báðum kynjum. Voru þeir m.a. látnir geragrein fyrir því hvernig fólk af hinu kyninu virkaði á þá af myndum. Niðurstaðan, sem birt er í tímaritinu Psychological Science, er sú að konur séu mun færari en karlar í að lesa líkamlega tjáningu hins kynsins.

Könnunin leiðir einnig í ljós að karlar misskilja ekki síður almenn vinahót kvenna en daður. Þá sýna viðtöl við námsmennina að konur telja karla mun næmari á slík skilaboð en þeir eru í raun.

„Skili daðrið ekki tilætluðum árangri þá getur vel hugsast að um misskilning sé að ræða fremur en áhugaleysi,” segja aðstandendur könnunarinnar í skýrslu sinni.

Dr. Coreen Farris, sem stjórnaði könnuninni, hvetur þó konur til að halda áfram að reyna. „Þetta eru meðaltalsniðurstöður. Sumir karlar eru mun næmari á slík merki en aðrir,” segir hún.

Kannski maður hafi aðeins of oft orðið vitni af svona misskilningi hjá hinu kyninu!!!
Nenni ekki að blogga vegna leti og auk þess er ég í mjög vondu skapi!!!
kveðja Drabban

Smá misheyrn hjá barninu!

2008-03-24T13:54:00.002Z

Ég verð nú bara að skrifa hér hvað krakkarassgatið mitt sagði áðan. Svona fyrir þá sem eru ekki inni á barnalandssíðunni hennar. Hún var að horfa á teiknimynd um Samma brunavörð og í lokin á þættinum þá er strákur sem er að borða pizzu og spaghetti. Ég er ekkert að veita þessum þætti neitt athygli né að hlusta á hvað persónurnar eru að segja. Allt í einu segir Íris hneyksluð við mig ,, mamma, veistu hvað strákurinn sagði! hann sagði,, ég er með tittling í tönnunum!. Ég var nú ekki alveg að gleypa við þessu að einhver færi að segja svona í teiknimynd þannig að ég spólaði til baka og hlustaði á hvað drengurinn sagði. Ég gat nú ekki annað en hlegið þegar ég heyrði hvað hann sagði . Hann sagði ,, það er kviknað í tönnunum á mér! en ekki það er tittlingur í tönnunum á mér. Ég vissi ekki einu sinni að krakkinn þekkti orðið tittlingur!! En mér fannst setningin algjör snilld!

Að öðru þá er Alfan og liðið í Melshorni farin og Árný og Magnea komu hér áðan að kveðja okkur þannig að nú fer allt liðið sem kom hér í páskafrí að fara aftur. Verst að maður hefur ekki mikið hitt neinn þar sem maður er búin að vera í hjúkrunarkonustarfinu undanfarið en þær stöllur eru nú að hressast þannig að maður fer að komast meira út úr húsi. Vinna á morgun! og svo er að finna einhvern sem getur tekið skvísuna með sér í flug til Reykjavíkur fyrir helgina. Þannig að ef einhver er að fara suður eða veit um einhvern sem er að fara og gæti tekið hana með þá endilega láta mig vita! Kveðja Drabban

Borða borða og chilla!

2008-03-23T18:39:00.005Z

Já já ég var búin að segja að ég ætlaði ekki að blogga meira um páskana en ég ákvað að gera það samt! Ekki það að ég hafi frá neinu spennó að segja. Bara það að ég hef lítið gert annað en að hanga heima yfir sjúklingunum múttu og Írisi þar sem þær eru enn veikar. Það varð sem sagt ekkert úr því að "unglingurinn" minn færi á Skagann fyrir páska vegna hita. Hún er hér enn, búin að borða brot af páskaegginu sem Alfa gaf henni þar sem ég var ekki búin að kaupa egg handa henni því það beið hennar eitt fyrir sunnan. En sem betur fer þá fékk Alfa þrjú egg gefins og gat séð af einu egginu sínu. Það er sem sagt búið að háma í sig súkkulaði hér í allann dag og allir komnir með ýstru (þeir sem ekki höfðu hana fyrir!hóst). það sem ég og hinir heimalingarnir erum búnar að bardúsa hér síðustu daga er: Mamma og Íris eru búnar að vera í rúminu svo það er ekki frá miklu að segja. Við Alfa erum hinsvegar nokkuð hressar og búnar að fara í ljós, sund, gönguferð sem er nú saga að segja frá! Við skelltum okkur nefninlega í hressigöngu út á sanda í fyrradag. Fórum út á tanga þar sem það var svo magnað brim og vorum að taka myndir af því. Ég sagði við Ölfu að það væri nú gaman að hafa hana inn á einni myndinni og með brimið í bakgrunn. Alfa fór því aðeins nær og settist á stein sem var alveg þurr og allt umhverfið í kring í a.m.k. 3 metra frá þar sem sjórinn var að dropa niður. En nei nei, um leið og ég fer að smella af og taka mynd, þá gýs líka þetta svaka brim og þvílík gusan sem fer yfir Ölfu og hún rennblotnaði! Ég náði þessu þokkalega á mynd eins og sést hér fyrir ofan. Þetta var svo fyndið að það hálfa væri nóg! Við sátum svo í svona hálftíma eftir þetta og vorum að vonast til að ná annarri svona mynd af gusu en nei nei það var sko ekki ein svona gusa í viðbót! bara þetta eina skipti sem Alfa vogaði sér nær! En mikið djöf... var þetta hressandi ganga samt og við komum (eða alla vega ég) þreyttar og útiteknar til baka. Fínt eftir inniveruna þar sem ég er búin að vera að stjana við sjúklingana. Í gær fórum við svo í grillmatarboð í Melshorn og þar var þvílíkt borðað og spilað. Ég kíkti svo í Löngubúðina í gærkvöldi og hitt þar fullt af fullu og ekki fullu fólki og það var mjög gaman, nennti samt ekki í eftirparty og fór því heim og skreið upp í rúm til Ölfu þar sem hún er nú búin að hreiðra um sig þar síðustu daga þar sem Íris hefur sofið niðri hjá múttu undanfarið. Við liggjum uppi í rúmi og horfum á eitthvað af flakkaranum þar til við dettum báðar út. Svo er það yfirleitt ég sem vakna nokkru síðar og slekk á öllu draslinu. Við erum svo bara búnar að hafa það kósí og chilla hér heima. Erum að fara að borða eitthvað voða gott á eftir og sjálfsagt verður páskaegg og góð ræma á eftir. Alfa fer svo suður á morgun og það er jafnframt síðasti páskafrísdagurinn minn þetta árið. Well, nóg í dag. Kveðja Drabban

Gleðilega páska

2008-03-19T21:20:00.003Z

Jæja þá er maður loksins komin í páskafrí! Ég byrjaði óvart einum degi fyrr en ég átti en það er vegna þess að Írisin er orðin veik og var kominn með hita og magaverki í nótt svo við vorum heima í dag. Mamma er líka svo veik að hún er búin að vera í rúminu í þrjá daga og svo slöpp að það var ekki einu sinni inn í myndinni að skilja Írisi eftir hjá henni svo ég gæti farið í vinnu. Ég var heima í dag og að stjana við þær eða "stjána" eins og Íris segir alltaf. Þær hafa því báðar verið í rúminu í allann dag og báðar þræl slappar. Ég hef það sem viðmiðun að dóttir mín er veik og það mikið þegar hún getur ekki sungið og talar ekki mikið. Og þannig er hún einmitt búin að vera í dag. Þögul sem steinn! Ég afrekaði svoldið í dag sem ég hef aldrei gert áður og hef eiginlega forðast að takast á við í mörg ár. En það er að elda KJÖTSÚPU! Ef það er eitthvað sem mér finnst leiðinlegt þá er það að elda. En maður verður nú að fara að taka sig á í eldhúsinu. Ég hef svo sem ekki gert mikið í dag fyrir utan að liggja hjá krílinu mínu og halda í hendina á henni. Ég þeyttist þó með ryksuguna um húsið meðan þær hvíldu sig yfir teiknimynd. Alfa systir er að koma á eftir. Við bíðum spenntar eftir henni. Hún er að koma með Óla, Vigdísi, Regínu og Birni. Alfa er að koma klifjuð páskaeggjum sem hún hefur fengið gefins og ætlar að deila með okkur! Planið er svo bara að slaka á í faðmi fjölskyldunnar, borða, kannski djamma á laugardagskvöldið ef það verður þá eitthvað um að vera. Það er vonandi að krakkinn hressist því hún ætlar að vera á Skaganum um páskana. En eins og staðan er núna er hún ekkert að fara í bili. En jæja kannski maður fari að glápa á imbann. Segi bara gleðilega páska! Reikna ekki með að blogga meira um páskana, en hver veit. Kveðja Drabban

Magosbolgos!

2008-03-12T17:42:00.003Z

Humm! ég var ekkert ýkja ánægð með undirtektirnar á síðasta bloggi þegar ég "heimtaði" að þeir sem mundu lesa þvæluna mína mundu commenta svo ég fengi nú smá sýn á hverjir koma hér inn. Það eru allir velkomnir hér inn enda er þessi síða opin og hér er ég ekki að fá útrás fyrir pirringi í garð eins né neins! Ég fékk þrjú comment síðast og tvö af þeim voru frá fólki sem ég vissi ekki að væru að "lesa mig" en mér fannst líka voða gaman að vita af því að þau kíki á þetta annað slagið. Það var nú einn "dúddi" sem sagði mér á barnum um síðustu helgi að hann læsi lufsuþankana mína og ég heimtaði að hann mundi skilja eftir comment, en hann man kannski ekki eftir þessu samtali okkar!! :)
En að öðru. Þar sem ótrúlega margir hafa spurt mig hvað kom út úr skoðuninni á Norðfirði þá er best að ég komi enn og aftur með "sjúkrasögu" mína og vonandi er þetta sú síðasta! eða allavega í langann tíma! En ég fór sem sagt á Nobbann á mánudaginn í ómskoðun en það kom ekkert út úr því þannig að ég var sett í magaspeglun. Andsk... helví.. djö... (svona svo ég blóti nú ekki) var þetta vont!!! Ég var spurð að því áður en ég fór í þetta hvort ég hefði farið áður í svona en ég neitaði og þá var ég spurð hvort ég þekkti einhverja sem hefðu farið í þetta og þá játti ég og þá kom ,, og hvað segir fólk um þetta". Auðvita sagði ég bara eins og er að ég hefði bara heyrt að þetta væri vont en hjúkkan sagði bara að það væri bara vitleysa og ég skildi ekkert stressa mig. Ég get bara sagt að ég vona að ég þurfi ekki að fara í magaspeglun aftur meðan svona huge slöngu er troðið ofan í mann. Ég sá varla neitt fyrir tárum því ég táraðist svo meðan ég gúgaðist. En út úr þessu kom að ég er með magabólgur og fékk 4 vikna kúr við því sem á að laga það alveg. Kosturinn við að þetta eru "bara" magabólgur en ekki gallsteinar eins og svo margir voru búinir að "veðja" á því þá hefði ég þurft að fara suður í uppskurð! Laus við það get ég farið að stunda mína vinnu aftur. Þarf samt svoldið að passa hvað ég borða meðan ég er að jafna mig. En ég er spræk og þá er ég sátt. Svo á það eftir að koma í ljós um helgina hvort maginn er eitthvað að jafna sig því þá ætla ég að innbyrða nokkrum öllurum eða öðrum slíkum mjöð þar sem við stelpurnar erum að fara að kveðja hana Snædísi okkar sem er að fara að yfirgefa okkur vonandi bara í eitt ár. Hún stefnir á að koma aftur og ég vona svo sannarlega að hún geri það. Hún er svoddan snillingur að það hálfa væri nóg! Hún á alveg fyndnustu bloggin. Það er bara eitt sem er vandamál helgarinnar en það er hvar á að halda partý!! Það er nú bara þannig að það virðist ekki henta neinsstaðar en við deyjum nú ekki ráðalausar ef ég þekki okkur rétt. Hvíti kassinn veður tekin með eitthvað ef þess þarf! Fyrir þá sem ekki vita hvað hvíti kassinn er þá er í honum hátalarar, litlir en súper góðir, hljóðsnúrur og svo fer ipodinn þar í ef redda á tónlist einhversstaðar! Það er víða sem ég hef dröslast með þennan blessaða kassa með mér og í misjöfnu ástandi! Say no more! Úllala!! meðan ég er að skrifa þessi orð þá eru allir tiltækir slökkviliðsmenn að bruna á brunabílnum út og þegar svona lagað gerist hér þá vekur það ákveðna spennu þar sem Slökkviliðið hér hefur yfirleitt ekkert að gera en þetta er nú í annað skiptið á viku sem það er útkall!!! Síðast var bruni í bát sem var við höfnina en það var víst búið að slökkva eldinn áður en liðið mætti. Nú er bara að bíða og sjá hvað sé að gerast hér í þessu litla rólegheita þorpi mínu!! P.s ég er ekki forvitin samt!! Vona samt að það sé ekkert alvarlegt. En það er samt best að hætt núna og fara að sinna heimilisverkunum! Kveðja í bili Drabban

Sunday bloody sunday!

2008-03-09T18:29:00.005Z

Daginn! Það ætlar ekki að hætta að snjóa hér á þessu blessaða landi!! Ég sem er búin að þrjóskast við að setja nagladekkin sem ég á EKKI undir bílinn minn en ég hefði nú kannski átt að gera það strax í okt. Nei nei ég var svo ákveðin í því að veturinn í ár yrði eins og sá í fyrra þegar það voru einungis fjórir dagar sem nagladekkjanna var þörf. En mín kemst samt allt á kagganum! Á föstudaginn í vinnunni var starfsdagur og nóttina áður var búið að snjóa geðveikt. þegar ég mætti í vinnuna klukkan 8 þá var ég sú eina sem hafði KOMIST á bíl!! Og ég sú eina á sumardekkjum. Mikið var ég ánægð með súbbann minn. Hinar komu ýmist gangandi eða létu hann Helga Garðars sækja sig og keyra í vinnu. En það rættist þvílíkt úr veðrinu á föstudaginn og þegar ég var búin að vinna um 3 þá var komið blankalogn og sólskin og því ekki að ræða það að fara að húka inni og gera ekki neitt. Eftir að hafa samt hangið á sjoppunni í smá tíma á kjaftatörn við hina og þessa en þá aðallega þessa þá fór ég heim og tók niður tvær jólaseríur sem enn hengu utan á húsinu. Svo fór ég í að moka svalirnar og bílaplanið! Yfirfull af orku og bara svo gott að komast aðeins út eftir innihangið í veikindunum. Ætli klukkan hafi ekki verið að verða 7 þegar við mæðgur fórum loks inn, endurnærðar eftir útiveruna. Ég var eiginlega hálf löt um kvöldið en setti mynd á skjáinn, eitthvað sem ég fann á flakkaranum hjá mér. Mynd sem heitir The Caveman og er m.a. með Ringo Star í aðalhlutverki. Þessi mynd er alveg gjörsamlega fáránleg en engu að síður bráðfyndin á köflum. Ég var samt ekkert að festast yfir henni beint því ég var líka eins og vanalega hangandi á msn að spjalla við hina og þessa, en þó aðallega hina. Ég steinsofnaði svo yfir einhverri annarri vellu-mynd sem ég setti á. Ég gerði nú ekki mikið á laugardaginn sjálfann nema fara í sund. Var svo bara að dandalast eitthvað heima en fór út á bar um kvöldið með Helgu og Júllu. Ég ákvað að vera á bíl þar sem ég vildi ekki taka sjensinn á því að áfengið færi vel í mig. En það var svo sem ekkert að því að vera edrú svona einu sinni. Fór heim um 4 eftir að hafa kíkt smá eftirparty. Nörraðist svoldið í tölvunni þegar ég kom heim og vaknaði því ekki fyrr en um 10 í morgun þegar skæruliðinn æddi inn til mín og kveikti öll ljós!! Eitthvað sem ég þoli ekki, þegar ljósin eru kveikt þegar ég er sofandi. Friðurinn var því úti þannig að það var eins gott að fara á fætur og gera eitthvað gáfulegt. Ég er samt ekki búin að gera neitt mikið í dag nema þrífa, borða, æfa mig á gítarinn (alveg þörf á því) og svo settist ég aðeins niður og bjó til hálsmen og armbönd í safnið mitt. Planið í kvöld er að gera ekki neitt nema kvíða fyrir ferinni á Norðfjörð á morgun. Ég er sem sagt að fara í ómskoðun á morgun og athuga hvort það er gallsteinar sem eru og hafa verið að gera mér lífið leitt undanfari. Mér finnst alls ekki spennó að fara að keyra þangað út í rassg... en það verður víst að gerast. Ég verð kannski með menntaskólaskvísu með í för sem þarf að komast á Nobbann. En kannski ég slútti þessu bloggi og fari að elda!! Ég vil endilega að fleiri commenti hjá mér sem lesa þessa þvælu mína. Langar svo að vita hverjir eru að "fylgjast" með mér! Kveðja Drabban

Steypa og meiri steypa!!

2008-03-05T21:07:00.006Z

Jæja kominn tími á smá blogg. Ég hef nú ekki frá miklu að segja þar sem ég er búin að vera í rúminu í rúma viku! Nánast samfleytt en þó ekki. Ég er búin að vera að deyja í maganum frá því á þriðjudaginn síðasta og verkirnir voru svo gríðarlegir að ég kallaði út lækni tvisvar um helgina. Í fyrraskiptið fékk ég töflur sem áttu að byrja að virka á nokkrum dögum! Ég sem var sárkvalin og var ekkert tilbúin að líða þessar kvalir í nokkra daga í viðbót. Nú ég fór heim, leið svo sem ekkert betur ( kannski afþví að töflurnar sem ég fékk runnu út í ágúst 2006! )nema á laugardagsmorguninn var ég skítsæmileg og verkjalaus nánast og ákvað að harka af mér og fara með krakkann í íþróttahúsið í leikjatíma. Það gekk áfallalaust en klukkan hálf þrjú kom verkurinn aftur og um 9 leitið um kvöldið var hann orðinn svo gríðarlegur að mér var hætt að lítast á blikuna þannig að ég fór aftur til doksa, nema hvað að Auðbergur læknir var í fríi og mér mætti ungur, já já þokkalega huggulegur gaur í her/veiðifatnaði frá toppi til táa og með stórann hníf hangandi í beltinu og svona hálfann wriggley tyggjópakka uppi í sér! Mér leist ekki alveg á blikuna í fyrstu en svo þegar hann sagðist hafa verið að fara á tófuveiðar þá róaðist ég. Hann yfirheyrði mig um málið, lét mig fá fleiri lyf og sagði mér að hafa samband á mánudaginn ef ég yrði ekki betri. Ég var betri á mánudaginn en alls ekki góð svo ég hafði samband við doksann og hann sagðist ætla að panta fyrir mig í ómskoðun á Neskaupstað, til að kanna hvort þetta séu gallsteinar. Ég hef ekki fengið að vita ennþá hvort og hvenær ég á að mæta. Týpiskt að ég fái tíma loksins þegar ég verð orðin góð og svo seinna á allt eftir að blossa upp aftur. Þetta er alls ekki í fyrsta skiptið sem ég fæ svona verki. Síðast þá var ég send suður í ómskoðun nokkrum dögum eftir kastið og þá var auðvitað ekkert að sjá í ómskoðuninni!! En það er alveg á hreinu að ég sit ekki þegjandi og hljóðlaust í nokkra daga ef ég fæ þennan viðbjóð aftur!!! En nóg af veikindum. Kannski ég segi frekar frá því sem ég er búin að vera að gera meðan ég er búin að vera veik heima. Það er ekki langur listi... lesa, PRJÓNA, og liggja í sömu stellingunni uppi í rúmi í myrkri og kveljast. Ég hef varla haft rænu á að starta tölvunni og hvað þá að blogga! En þetta með að prjóna er víst ágætis afþreying þegar maður þarf að liggja í rúminu en reisa sig upp annað slagið. En mér hefur fundist ég vera eins og ekta gamalmenni undanfarið, prjóna og sef. Ég vona svo sannarlega að ég geti mætt í vinnuna á morgun, áður en ég tapa geðheilsunni á að hanga svona inni. Og ekki nóg með það því ég er svo sannarlega komin með LJÓTUNA á háu stigi. Þannig að ef einhver mætir mér á götu úti þá ekki láta ykkur bregða. En svona verður maður til lengdar eftir veikindi!
Ég er skíthrædd um að útvarpsvekjarinn sem hefur fylgt mér í ?? mörg ár eða síðan ég fermdist,,, ætli það hafi ekki verið 1991. Jesús hver man svona lagað. En allavega þá fékk ég hann frá Unni við hliðina (flutt reyndar). Þessi útvarpsvekjari fór m.a. með mér í menntó og stóð sig ljómandi vel við að koma mér á fætur þar til einn daginn þá fann ég svo skrítna lykt á skrifborðinu mínu þar sem þessi elska stóð. Skyndilega gaus upp reykur aftan á honum og ég var fljót að kippa honum úr sambandi. Það sem var að gerast var að leiðslan sem liggur inn í hann var að bráðna í sundur!! Ég var ýkt svekkt og hafði einhverra hluta vegna orð á því við Kalla heitinn vin minn. Hann var fljótur að bjóðast til að kíkja á hann en þar sem ég hafði nú ekki svo mikla trú á honum og rafmagnstækjum af því sem ég hafði heyrt um meðferð hans á slíkum hlutum þá fannst mér það í lagi að hann fengi hann því vekjarinn væri hvort sem er ónýtur. Þannig að hann fékk vekjarann og viku seinna rétti hann mér hann aftur ásamt nokkrum skrúfum og dóti og sagði,, Hann virkar en ég veit ekkert hvar þessar skrúfur og dót eiga að vera í honum". Ég hló nú bara og ákvað að prófa dæmið. Hristi hann (vekjarann sko) aðeins til og það hringlaði vel í honum og gerir reyndar enn. Setti hann í samband og viti menn hann svínvirkaði og gerir enn.!!!! Nema.... annað slagið þá fer hann að gefa frá sé hljóð líkt og mal í ketti eða miðstöðvarhljóð og það fer alveg í mínar fínustu nema ég fattaði það að það er nóg að banka aðeins í hann og þá hættir hann. En síðustu daga meðan ég hef verið heima og 90% af tímanum í rúminu með vekjarann við hliðina á mér þá hefur mér fundist hann "mala" full mikið. Kannski það að ég sé búin að vera tæp á geði!! held samt ekki en ég er búin að dangla svo mikið í greiið að ég held svei mér að hann sé að bregðast mér og deyja!! Hvað gera bændur þá? Ekki halda að ég sé að missa vitið á að blogga um útvarpsvekjarann minn en kannski ég þurfi bara smá útrás þar sem ég hef verið allt of mikið ein heima undanfarið!!! Nú vona ég að ég komist út á meðal manna sem fyrst svo ég verði ekki steiktari!!! Jæja enough!!!! Sendið mér comment ef ykkur finnst ég eiga heima á hæli eftir þetta blogg!! Kveðja Drabban

Bústaðarferð hinna útvöldu!

2008-02-24T21:15:00.003Z

Jæja þá erum við skvísurnar loksins búnar að fara í hina umtöluðu bústaðarferð sem farin er einu sinni á ári. Þetta er reyndar bara í annaðskiptið sem við förum en við erum sko strax farnar að plana þá næstu! Það var tekið með slatta af áfengi og óhollustu, singstar, málningardót, náttbuxur og að sjálfsögðu sundfatnaður. Það var sko alveg á hreinu að það yrði ekki klætt sig í annað en sundbol og náttfötin til skiptis! Ég held að ég hafi sjaldan skemmt mér eins vel og þessa helgi og hláturtaugarnar alveg með harðsperrur sko. Við vorum í bleyti alla helgina ýmist í bottinum eða búsinu. Borðuðum humar, kjúlla og endalaust af snakki, nammi og fleiru. Ég tók yfir 400 myndir um helgina og aðeins sumar þeirra eru byrtingarhæfar! Við vorum allar með LJÓTUNA um helgina og fór það okkur alveg með eindæmum vel. Máluðum hvor aðra eins og ég veit ekki hvað. Spiluðum fimbulfamb, leironary og fleiri spil. Hefðum sko alveg getað verið mikið lengur þarna í kósíheitum. En allt tekur jú enda og við rúlluðum okkur heim ótrúlega snemma í dag miðað við hvað við (aðallega ég, Júlla og Helga) vorum lengi á fótum í nótt að missa okkur í djamminu. Lágum meira en tvo tíma í pottinum. En þegar við komum heim í dag þá var stefnan tekin beint á sjoppuna í þynnkuborgara og svei mér ef hann stuðlaði ekki bara að því að ég hef verið umgengnishæf í dag. Veit ekki alveg hvað er að gerast með mig og þynnkuna. Var svo búin að búa mig undir það versta en ég er svo þokkalega hress, reyndar alveg ógeðslega syfjuð þar sem það var eitthvað lítið sofið enda enginn tími til þess. Jæja það verður ekki farið nánar út í ævintýri helgarinnar en ég ætlaði að reyna að láta nokkrar myndir fylgja með en það sem þær eru svo ógeðslega lengi að hlaðast inn þá bara nenni ég því ekki en geri það síðar. Kveðja Drabban

Kongo-London-Kongo

2008-02-16T21:34:00.003Z

Ætli það sé ekki kominn tími á smá blogg hér hjá mér. Ég er jú búin að fara til London að heimsækja Rán systur. Ég, mamma og Íris flugum frá Egilsstöðum til Reykjavíkur á miðvikudagskvöldið og komum til Ölfu um 10. Á fimmtudeginum fór ég í tvær læknaferðir. Aðra þeirra vissi ég ekki alveg út af hverju ég var send í en það var afleysingalæknir hér um daginn sem vildi senda mig í heilalínurit!! Ekki fara að fá einhverjar ranghugsanir um mig. Við vorum nú að gera grín af því í vinnunni hjá mér að hann (læknirinn) hafi ekki þurft nema að heyra mig tala til að sjá að ég væri ekki í lagi og þess vegna hafi hann ákveðið að senda mig og láta athuga í mér heilann. En það var nú ekki svo slæmt sem betur fer. Þetta var víst eitthvað tengt því að ég fæ stundum svo í magann að ég dett út. Hann spurði mig hvort ég væri að missa meðvitund eða líða yfir mig en ég get ekki svarað því þar sem ég hef alltaf verið ein þegar þetta gerist , sem er sem betur fer ekki oft. Það var eitthvað verið að athuga flogaveiki og virkni heilans og ég er sem betur fer alveg heil í hausnum þar sem ekkert athugavert fannst að mér! Já já ég veit samt að ég er skrítin! Hin læknisheimsóknin mín var í sneyðmyndatöku á bakinu því ég er búin að vera svo slæm í bakinu í marga mánuði en eins og allt með mig þá finnst ekkert að mér og það er ekkert að bakinu á mér heldur sem sést á mynd. Maður búin að eyða fullt af peningum í svona læknarugl og ekkert að manni. Spurning hvort ég sé svona ímyndunarveik! En jæja nóg af mér og mínum göllum. Á fimmtudaginn var svo brjálað veður að það var varla fært innanbæjar í Reykjavíkinni við ákváðum samt að kíkja í smá afmælisboð til Regínu frænku sem varð 27 ára á fimmtudaginn. Þar sem veðurspáin var hrikaleg fyrir nóttina og morguninn þá var ákveðið að taka flottheitin á allt og fara um kvöldið ásamt Óla frænda og Vigdísi ,sem voru líka á leiðinni til London, á flughótelið í Keflavík og gista þar svo við kæmumst alveg örugglega út á völl í flug um morguninn. Það var búið að segja að það væri ófært innanbæjar í Keflavík. Óli og Vigdís voru fyrr um kvöldið búin að bíða heillengi í bílaröð til að vera hleypt yfir Þrengslin til að komast í bæinn. Við fórum sem sagt til Keflavíkur í brjáluðum skafrenningi og komust á hótelið. Sváfum til 6 um morguninn og þurftum þá að koma okkur út á völl. Það gekk ágætlega þar sem veðrið var þokkalegt akkúrat þarna. Það hefði ekki verði hlaupið að því að komast úr Reykjavíkinni ef við hefðum þurft þess þarna um nóttina. En jæja við út á völl, hittum þar Reyni frænda, Njál, Binna og Guðmund Helga sem allir voru á leiðinni til London í sömu vél og við hin. Allir á leiðinni á Arsenal leik. Binni og Guðmundur höfðu farið frá Djúpavogi í brjáluðu veðri og þeir voru alveg geðveikt lengi á leiðinni, ætluðu varla að hafa það af stundum. En komust áfram á þrjóskunni því þeir voru sko ekki tilbúnir að missa af leiknum. Íris var svo ánægð að hitta Reyni frænda sinn að hún hengdi sig alveg á hann og hann átti sko að leiða hana í gegnum fríhöfnina og út í vél og hún vildi sko fá að sitja hjá honum á leiðinni en það var ekki látið eftir henni þ ar sem þeir voru svo langt frá okkar sætum. Reynir var alveg hæstánægður með þessa athygli enda algjör barnakall. Þegar við komum til London fórum við á Paddingtonlestarstöðina og hittum þar Höllu, Rögnu og Ingibjörgu (dóttur Vigdísar) og fórum öll út að borða. Við splittuðum svo hópnum þar sem þau voru að fara á hótel en við til Ránar. Það sem helst var gert í London var að rölta Oxfordstreet og eyða peningum. Ég verslaði ekki mikið en náði samt að eyða þeim fáu krónum sem ég átti. Ég ætlaði að versla föt á krakkann en það er sko ekki lagt mikið upp í barnaföt þarna á Oxfordstreet því ég náði ekki að kaupa nema nokkrar flíkur á krakkann. Ekki íþróttaskó eins og hann vantaði! Þegar maður kom heim eftir að vera búin að vera í bænum þá var maður ógeðslega skítug. Ég tók hvítann þvottapoka og strauk framan úr mér og hann varð nánast svartur svona er mengunin mikil þarna. Íris fékk þvílík útbrot og flekki í andlitið en það lagaðist sem betur fer eftir svoldinn tíma eftir að ég var búin að þvo henni vel og setja vaselin í andlitið á henni. Hún hefur sennilega ekki þolað mengunina. Á laugardagskvöldið hittum við Óla, Vigdísi og stelpurnar og fórum öll út að borða á geðveikann líbanskann veitingarstað. Maturinn var rosalega góður og við ultum næstum út við borðuð svo mikið. Það var magadansmær sem dansaði fyrir okkur og Íris var svo heilluð að ég yrði ekki hissa þó hún væri að æfa nokkrar sveiflur eins og hún sá konuna gera. Við flugum heim, eftir frábærann tíma hjá Ránslunni, þriðjudagskvöldið áttum að fara í loftið um 9 en fluginu seinkaði og við biðum í rúmann klukkutíma. Við vorum ekki komin heim til Ölfu fyrr en 3 um nóttina og við vorum allar mjög þreyttar. Íris fór svo á Akranes daginn eftir en við mamma flugum heim á yndislega Djúpavoginn. Ég var hálf fegin að komast heim úr þessu menningaráreiti! Jæja nú ætla ég að hætta að blogga í bili. Efast um að nokkur nenni að lesa svona langann pistil.. Leiter aligeiters. Kveðja Drabban

Misheppnuð helgi hjá mér!

2008-02-03T21:49:00.000Z

Það er nefninlega það!! ég var víst búin að lofa því að vera með einhverjar kjaftasögur á hreinu hér eftir þorrablótið en ég verð víst að svíkja það! Mín var nefninlega veik í gær, meikaði rétt svo að kíkja á matinn/skemmtiatriðin en fór svo beinustu leið heim í rúmið þar sem ég var alveg að drepast í maganum. Það hlaut að koma að því að ég yrði veik, bara allir í kringum mig búnir að vera með pestina og hún búin að vera að malla hér síðan fyrir jólin. Ég er svo sein alltaf alveg sama í hverju þannig að ég fékk pestina seinust sjálfsagt. Vona samt að ég verði búin að jafna mig fyrir London ferðina. Það er komin svoldil tilhlökkun í mig. Búið að plana út að borða á laugardagskvöldinu á Líbanskan stað með Óla frænda, Höllu og Rögnu og fleirum held ég. Gaman að hitta þau í London. Þau eru öll að fara á fótboltaleik. En aftur að þorrablótinu þá var mjög gaman að skemmtiatriðunum. Ásdís Heiðdal bjargaði alveg kvöldinu. Þvílíkur snilli þar á ferð. Var nú bara að gera grín af öllum og engum, hún tók bara lagið og dansaði eins og maniac og var alveg drepfyndin. Ég átti voða bágt með að hlægja vegna magaverkja en þegar hún byrjaði þá var nú ekki hægt að halda aftur að sér og ég þurfti alveg að þurka tárin. Það var svo alveg brilljant leikþáttur um tvær kvensur hér sem skelltu sér til Póllands í einhverja heilsulind. Eiginlega ekki hægt að segja frá því hér en það var notað "stólpípur" sem eitt af leikmununum í leikþættinum. Ég var hálf svekkt að komast ekki á ballið í gær, en það þýðir víst ekkert að vera að svekkja sig á því. Það var víst rosa stuð og partý á eftir ball þannig að þeir sem eru harðastir í djamminu gátu víst verið að eitthvað frameftir í nótt. Veðrið var ekki upp á marga fiskana í nótt og ég var ekkert að öfunda þá sem þurftu að labba heim til sín í nótt í skafrenningi og snjókomu til skiptis. En hver er að spá í það eftir nokkra öllara. Ég minni enn á myndasíðuna mína hér til hliðar, gama að heyra frá einhverjum hvað þeim finnst,, ekki amaleg náttúran hér á Djúpavogi og mér finnst ekkert leiðinlegt að smella af hinu og þessu í þessum fáu gönguferðum sem ég fæ mér á ári. Hlakka bara til að fá nýju vélina og fara og leika mér úti í náttúrunni. Jæja sjúklingurinn þarf að fara að sofa. Kveðja Drabban

Nýr linkur!

2008-02-02T00:32:00.000Z

Jæja ætli mér hafi tekist að henda inn myndalink hér. Ég hef aðeins dundað mér við að setja myndir inn á nýja Fotki síðu. Svo er spurning hvort einhver sé að skoða þær. En annars er allt gott að frétta, brjálað veður eða þannig. Þorrablót á morgun sem ég er svona að ýmsu leiti spennt fyrir en það sem ég er ekki að fíla er það að ég komst ekki í klippingu fyrir blótið né gat keypt mér föt, þannig að á morgun verður heljar verkefni að finna eitthvað viðeigandi á blótið og reyna að töfra fram hár sem ekki verður hlegið af! Kannski maður hafi frá einhverju að segja næst þegar þegar blogga. Nenni ekki meiru núna. Kveðja Drabban

Jæja þá!

2008-01-24T21:44:00.000Z

Ég er undanfarið búin að vera að reyna að finna mér góða ástæðu til að afsaka bloggleysið hjá mér en þar sem ég hef ekki enn komið upp með neina og farin að fá skammir frá frænkum í Hafnarfirðinum þá verð ég bara að viðurkenna að ég hef einfaldlega ekki nennt þessu. Mér finnst ég ekki hafa frá neinu merkilegu að segja. Ég lifi hálfpartinn vinna, borða, hanga í tölvunni ,sofa lífi en þrátt fyrir að ég hangi flest kvöld í tölvunni þá gef ég mér ekki tíma til að blogga. Það litla sem ég hef aðhafst undanfarið er t.d að fara í partý til Helgu vinkonu. Tók með mér "partý-tónlistar-kassann" eða hvíta kassann eins og hann er bara kallaður í honum er sem sagt tölvuhátalarar með rosa góðu soundi, hljóðsnúrur og svo er Ipodinum stungið í hann við svona tilefni. Það var drukkið og djammað til 6 um morguninn og þvílíkt sem það var nú gaman. Um þarsíðu helgi fór ég á Egilsstaði að sækja Írisi mína og kom m.a. við í Húsasmiðjunni og keypti málningu til að mála eldhúsið hja afa mínum. Ég skellti mér svo í það í vikunni að mála eldhúsið ásamt þeim gamla. Við vorum bara nokkuð ánægt með verkið. Setti upp nýjar gardínur og svona fyrir hann þannig að það var orðið voða huggulegt hjá honum. Það er svo á plani næstu mánaða að mála eldhúsið hjá okkur líka. Það verður gert einhverntímann í feb eða síðar þar sem við mæðgur ég, íris, mamma og alfa erum að fara að heimsækja Rán til London 8-12 febrúar. Ég er búin að hlakka til að koma út og fá nýju myndavélina mína sem ég var að kaupa mér frá Amazone. Spurði Rán í kvöld hvort að pakkinn væri komin til hennar en hún sagðist hafa fundið miða frá pósthúsinu eða póstburðarmanninum um að hún hefði ekki verið heima þegar hann hefði komið að afhenda pakkann og ekki svarað þegar hann hringdi í hana þannig að hann skildi bara pakkann eftir hjá nágranna hennar í húsi númer 4!!! Vandinn er að það er ekkert hús númer 4 og Rán veit ekkert hvar pakkinn er!!! Hún ætlar að hringja á morgun og athuga þetta fyrir mér. Hvaða hálfvi..... lætur nágranna í London taka pakka fyrir einhver þegar London er huge borg og hver segir að nágranninn sé einhver vinur manns eða hvort almennt sé einhver samskipti á milli fólks þarna. Það sem veldur mér mestu áhyggjunum er að ég er búin að borga pakkann!!!! 57.000 kall!!! Ég er með smá stresshnút í maganum yfir þessu. En ég vona það besta og að pakkinn minn verði komin til Ránar áður en ég kem. Ég er búin að borga og bóka ferð til New York í maí með stelpunum úr menntaskólanum. Við förum 8-12 maí. Ég veit minnst um þessa ferð en ég treysti stelpunum sem eru að plana þetta algjörlega fyrir þessu. Við verðum á þokkalega fínu hóteli og ekkert sparað við það. Það verður gaman að fara og hitta skvísurnar aftur. Ég hitti þær nánast aldrei. Alltaf þegar það er planað einhver hittingur þá er ég alltaf upptekin annarsstaðar og kemst ekki. Það er svona að búa úti á landi. En ég kvarta ekki yfir því því mér líður alveg rosalega vel hér. Jæja verð að hætta svo ég missi ekki af Aðþrengdum eiginkonum! Kveðja Drabban

Gleðilegt ár!!

2008-01-02T10:27:00.000Z

Gleðilegt ár allir!! Takk fyrir það gamla. Jólin voru notarleg eins og alltaf. Áramótin sömuleiðis fyrir utan það að systur mínar báðar og Íris voru ekki heima en við fengum Höllu, Rögnu og Óla frænda til okkar í staðinn. Ég er ekki í neinu bloggstuði þessa dagana eins og vel sést á síðunni minni. Ég er búin að vera of upptekin við að horfa á Grey´s Anatomy og Prison Break og að borða nammi!!! Ég lofa engu um framhaldið, ég sór ekki áramótaheit um að verða betri bloggari á nýju ári. Eina sem ég ætla að reyna að gera á nýja árinu er að ná svefni. Hann hefur látið lítið fyrir sér fara undanfarið. Kannski vegna gosdrykkju en ég ætla að minnka hana þegar jólin enda. Ég er að fara að dunda mér á næstu dögum við að búa mér til myndasíðu. Hún kemst vonandi í gagnið sem fyst. Ekki það að ég eigi mikið af myndum til að setja inn. Meira svona að hafa stað fyrir myndir sem maður getur bara haft link á þegar fólk er að biðja mann um að sýna sér myndir af hinu og þessu. Læt vita þegar mér tekst að ljúka við þetta. Jæja kaffið mitt að verða búið. Leiter aligeiters! Kveðja Drabban
P.s Ragnar Rafn frændi til hamingju með daginn!!!

Seríusjúklingur

2007-12-08T22:48:00.000Z

Djö... er ég að standa mig hér á blogginu! eða þannig. Látum okkur nú sjá.. Afmæli á fimmtudaginn þarsíðasta þegar Íris Antonía varð 4 ára. Afmælisveislan á laugardaginn og svo jólahlaðborð á hótelinu um kvöldið. Partý milli mats og barsins þar sem Stjáni var að trúbba, partý eftir barinn og mín afrekaði svoldið sem mér hefur ekki tekist í mjög langann tíma. Ég var í partýi til 9 um morguninn!!!! já og ég hafði ekki hugmynd um að klukkan væri orðin svona margt, það var bara svo gaman. Eða þangað til sumir komu og eyðilögðu allt, ég ætla ekki nánar útí það. Sunnudagurinn var ónýtur. Mánudagurinn var erfiður og þriðjudagurinn ekki góður þar sem ég var að drepast í bakinu. Miðvikudagurinn var ekki góður heldur þar sem ég var hálf slöpp og kom engu í verk eftir vinnu. Á fimmtudaginn var heilsan þokkaleg og ég dreif mig út að henda upp jólaseríum og náði að koma helling upp. Á samt helling eftir og sérstaklega þar sem ég fór á Egilsstaði í dag og keypti fullt meira af seríum til að setja upp úti. Maður fer ekkert að slaka á í seríunum. Við mæðgur fórum sem sagt á Egilsstaði í morgun í klippingu og svona að útrétta eitthvað. Við vorum ekki komnar heim fyrr en 7 í kvöld og ég náði bara að henda upp tveimur inniseríum áður en kósíheitin tóku við. Þau eru semsagt í gangi núna. Ég er í hægindastólnum með tölvuna, nammi og vínber og að horfa á imbann með öðru. Ég get orðið ekki farið að sofa snemma þar sem hún Ásdís H. var svo æðisleg að útvega mér Grey´s Anatomy þættina úr 4 seríu og ég á 9 til að horfa á núna!! horfði reyndar á nokkra í nótt en ætli ég eigi ekki 3 eftir. Jökull kom svo í gær með flakkarann sinn og var að láta mig fá tónleika með Muse og hjá honum fékk ég slatta af bíómyndum og þar sem ég er búin að sprengja plássið á þessum 4 250GB flökkurum sem ég á þá varð ég að fá flakkarann hennar mömmu lánaðann en hann hefur staðið ósnertur í pakkningunum í nokkra mánuði þannig að það var minnsta málið að fá hann. Nú þarf ég svona 5 auka klukkutíma í sólarhringinn til að skipuleggja flakkarana svon það sé ekki allt út um allt á þeim öllum. Eins og flestir vita þá er ég mjög skipulögð. En jæja ætli ég fari ekki að horfa á Grey´s!!!! Góða helgi það sem eftir er af henni .. Kveðja Drabban

Allir komnir í kotið!!!

2007-11-23T21:23:00.000Z

Enn ein vikan búin,, eða reyndar tvær síðan ég bloggaði síðast. Ég gerði ekkert um síðustu helgi þrátt fyrir að hafa planað hana. Við Helga ætluðum að vera á fullu að föndra jólakort til að selja á jólamarkaði sem verður á morgun en vegna veikinda Helgu á laugardeginum þá gerðum við ekkert. Ætli við höfum ekki náð að gera sitthvor tvö kortin á föstudagskvöldinu eftir að hafa gætt okkur á humar og hvítvíni. Júlla kíkti á okkur og við sátum bara og kjöftuðum en fengum aldrei jólaföndursandann yfir okkur enda allt of snemmt fyrir slíkt. Á sunnudeginum fór ég á Breiðdalsvík eftir hádegi, fór í Bowentíma til Eddu og fór svo á Egilsstaði til að taka á móti "unglingnum" mínum. Hún var loksins að koma heim, búin að vera í burtu síðan 23, okt. Hún fékk að fljóta með Snædísi og Selmu í flugi og ég tók þær svo með mér heim. Það var helv... hálka á Fagradal , ekki það skemmtilegasta sem ég geri að keyra í hálku en annast var leiðin heim fín. Ég get svarið það að það tók á að fá gemlinginn heim því meðan hún var í burtu þá fór ég að sofa um 12 eða 1 en fystu tvo dagana eftir að hún kom heim fórum við báðar að sofa milli 9 og 10 og ég held bara að í bæði skiptin hafi ég verið sofnuð á undan. Smá viðbrygði í gangi eftir að hafa verið svona lengi heima en ég er búin að jafna mig núna. Vikan leið mjög hratt og strax komin föstudagur. Við fórum í 2 ára afmæli til Henrý Daða frænda eftir vinnu í dag og þegar við komum heim var mamma að skríða inn um dyrnar, búin að vera fyrir sunnan í tvær vikur c.a. Þannig að núna erum við mæðgur allar heima og verðum það vonandi fram yfir jól. Á morgun ætla ég að fara með skvísuna í leikjatíma í íþróttahúsið, fara svo og fá okkur pylsu/pulsu á eftir eins og venjan er, ekki bara hjá okkur heldur er ákveðinn hópur sem fer alltaf saman eftir tíma. Svo er ég að fara að vera með bás á jólamarkaðinum sem er milli 2 og 4 á morgun í Löngubúðinni og ég ætla að selja eitthvað að eyrnalokkunum, armböndunum og hálsmenunum sem ég er búin að vera að föndra undanfarið. Annað er óráðið með helgina,, kannski maður reyni bara að slaka á og njóta þess að hafa félagsskap. Fyrsta skiptið í mjööööögggg langan tíma þá leiddist mér á laugardaginn síðasta, en ég var ekki lengi að finna ráð við því.. setti tónlist á í botn og þá gleymi ég mér alveg. Það var svo mikið rok og ég svo veðurhrædd og hvað þá þegar ég er ein heima, þannig að tónlistin bjargaði mér alveg. Jæja ætli ég láti þetta ekki nægja í bili.. Kveðja Drabban

Sviðamessa og svaka stuð!

2007-11-14T16:32:00.000Z

Jæja það var víst verið að rukka mig um blogg um Sviðamessuna á hótelinu um helgina. Og ég sem hélt satt best að segja að það væri enginn að lesa þetta blogg mitt!! Gott mál ef einhver gerir það. Ég er búin að vera svo róleg yfir blogginu. En já hvar á maður að byrja frá síðasta bloggi. Ég er ein heima, búin að vera það í viku en búin að vera barnlaus í næstum 4 vikur!! Aldrei gerst áður að skvísan sé svona lengi frá mér. Þetta hefur nú samt bara verið bærilegt, ég hef alveg fundið mér nóg að gera og meira að segja svo mikið að sólarhringurinn mætti alveg vera lengri. Ég er að föndra eyrnalokka, armbönd og hálsmen. Er að fara að hella mér ásamt Helgu í jólakortagerð sem við ætlum að stefna að að selja á jólamarkaði. Ég hef "þurft" að fara út að ganga í síðustu viku vegna vöðvabólgu dauðans. Var svo slæm að mig svimaði og mér var flökurt. Annar handleggurinn á mér var vanvirkur og svo var ég með hausverk. Ég var búin að vera að drepast í bakinu alltaf á morgnana líka og búin að fara tvisvar til læknis og fá þau svör að þetta væri vöðvabólga í bakinu.. fékk þá ábendingu hvort rúmið mitt gæti kannski verið orðið lélegt! ég lét ekki segja mér það oftar en tvisvar og splæsti í nýtt rúm ferlíki sem er 193x203 og ég get sofið á hvaða hlið sem er í því því nóg er plássið. Ég er jú betri í bakinu og ákaflega ánægð með nýja rúmið. Ég er svo búin að fara tvisvar í Bowentækni tíma til að sjá hvort það hefur eitthvað að segja með að losna við vöðvabólgu. Það er helví.... notarlegt að fara í það og einstaklega afslappandi og ég hef fulla trú á að það sé að gera sig. Maður þarf víst að fara í 3 tíma til að það skili árangri og ég ætla í þann þriðja í næstu viku eða um helgina. Já á laugardaginn var svo sviðamessan og auðvitað skellti ég mér. Var alveg á báðum áttum fyrst en ákvað svo að drífa mig. Það var rosa fínt. Tónlistin góð, maturinn já bara eins og svið smakkast, og pizzan góð. Mér leist nú ekki á blikuna þegar maturinn var búinn og verið var að bíða eftir tónlistarshowinu,,,, kemur þá ekki Árni Johnsen upp á svið með gítarinn og tekur lagið!! ég var nú bara við það að komast í þjóðhátíðarstemmarann þegar hann loks hætti. Hann náði að rífa salinn upp með sér og fá flesta til að syngja. Já hann getur þetta kallinn! Málið var ekki að hann hafi verið FENGINN til að koma og spila! NEi nei hann á samt einhverjum vinin sínum sem er hótelstjóri einhversstaðar komu til að "njósna" og stela hugmyndinni um sviðamessuna. Þeir viðurkenndu það alveg og það var bara gott mál ef þetta er að spyrjast út hvað við kunnum að skemmta okkur vel hér á Congo. Eftir sjóvið var svo einhver dúddi ásamt öðrum að spila á kassagítara og þeir náðu alveg gríðalegri stemmningu og það var fullt af fólki á dansgólfinu allann tímann. Ég held að einhver hafi sagt mér að þessi gaur sem var að spila væri bróðir hans Didda (sigurjóns) en hinn veit ég ekkert um. Þegar tjúttið á hótelinu lauk þá fóru ég og 4 "útvaldir" hingað heim og við héldum áfram að dansa og hlusta á góða tónlist til 6 um morguninn. Já það er ekki hægt að segja annað en maður geti þetta enn!!! ég sem var farin að hafa áhyggjur af þessu! hef ekki getað tjúttað svona lengi í mjög langann tíma. Þessi vikan er svo bara búin að vera notarleg og róleg og ætli maður njóti þess bara ekki áfram fram að helgi að hafa það kósí ein heima!! Vona að einhver nenni að lesa þetta hjá mér.... reyniði svo að vera duglega að commenta hjá mér bara svo ég fái það á tilfinninguna að einhver nenni að fylgjast með mér¨!!!! Kveðja Drabban

Helgin að lokum komin

2007-11-04T21:11:00.000Z

Þá er hin árlega Lappaveisla í Hvoli yfirstaðin.. Það var svakalegt stuð eins og alltaf þegar þetta lið kemur saman.. Ég stakk af úr veislunni um 11 og fór í afmæli til Péturs pólska, hann var að halda upp á 32. ára afmælið sitt ásamt annarri konu frá póllandi. Þarna var samankomið lið frá íslandi og póllandi og mikið stuð, dansað og sungið. Það var eiginlega svoldið fyndið að þarna voru 5 stelpur frá Póllandi og 4 af þeim heita Agnescka!!! Þannig að ef þetta nafn var nefnt þá átti maður eins von á því að þær allar svöruðu nema þessi 5. sem heitir Eva. Ég skemmti mér rosalega vel og ég var ekki að fara heim fyrr en um 5 í morgun. Langt síðan ég hef verið svona lengi úti á rallinu. Ég var ekkert alltof hress í dag. Ekki góð samsetning að borða slátur og rófustöppu og drekka bjór og hvítvín ofan í allt það.. En ég var nú samt svoldið á fótum í dag enda ekki annað hægt þar sem það var að sjálfsögðu afgangsát hjá familíunni áður en liðið hélt suður á ný. Berglind, Birkir og Emelía Birta komu í heimsókn og það var æðislegt að hitta þau. Hún er nú meiri dúllan hún Emelía. Þau verða hér eitthvað á næstunni þannig að ég á eftir að njóta þess að hitta þau meira og aðeins hressar. Ég fór nú bara fram á náttfötunum. Alfa systir var hér. Ég sótti hana í flug á laugardaginn og svo fór hún með Óla og c.o aftur suður í dag.. Stutt stopp hjá henni en það er alltaf gaman að sjá hana. Hún Íris mín varð svo stóra systir í nótt. Fékk litla systur og hún er aðsjálfsögðu að springa úr stolti... Það er ekki annað sagt en að litla skvísan sé bara nokkuð lík Írisi þegar hún fæddist. Ég var búin að setja inn myndir á síðuna hennar Írisar. Nú er hún búin að vera í 12 daga á Akranesi og hún er ekkert farin að biðja um að koma heim. Það er búið að vera svo mikið að gera hjá henni. Fara á fótboltaæfingu, í leikhús, bíða eftir syskininu og svo á hún líka svo mikið af ættingjum sem hún hefur ekki hitt svo lengi. Nóg að gera sem sagt hjá henni. Ég er búin að reyna að nota tímann svoldið meðan hún er ekki hér. Ég hef reynt að fara út að labba eftir vinnu, er búin að vera svo þreytt í bakinu. Ætli ég verði ekki að fara að fjárfesta mér í nýju rúmi. Er búin að vera að skoða nokkur. Það er svo ógeðslega dýrt að kaupa sér rúm!!! Ætli ég verði ekki að koma mér í mjúkin hjá vísa með að kaupa mér rúm! Það er svo ekkert plan á næstunni. Mamma er að fara suður á miðvikudaginn, fer til Danmerkur að hitta "fósturdæturnar" Höllu og Rögnu. Hún er að fara með Óla bróður sínum og Vigdísi. Ég verð ein í kotinu á meðan. Ætli ég njóti þess ekki bara að vera með tónlist á og halda áfram að fönda eyrnalokka og armbönd eins og ég hef stundum verið að dunda mér við. Ég finn mér alltaf eitthvað að gera þó svo að ég sé ein. Næstu helgi er svo Sviðamessan á hótelinu. Ég býst nú alveg við því að fara en ég er samt ekki alveg búin að ákveða mig. Kannski ekki sniðugt að fara að taka ákvarðanir um það svona á sunnudegi eftir djamm! sé til í vikunni þegar ég fer að gleym eftirköstum gærdagsins. En jæja nóg í dag.... kveðja Drabban

Afmæli hjá Júllu vinkonu minni!!

2007-10-28T23:03:00.000Z

Þessi skvísa var að halda upp á 30 ára afmælið sitt um helgina!! Það var svaka stuð og fullt af fólki að samgleðjast með henni. Þessi mynd af henni er reyndar síðan fyrir c.a. 18 árum!!! vá hrikalegt að geta sagt svona. En tíminn líður! Ég bjóst svo við því að eyða deginum í rúminu í dag í leti en þess í stað dreif ég mig út í gönguferð ásamt múttu og það var svo hressandi. Annars er dagurin búin að vera mjög rólegur. Fór í gott freyðibað, borðaði humarsúpu í kvöldmat, borðaði fullt af nammi og er bara í kósíheitum þessa stundina. Ætla að halda áfram að hafa kósíkvöld á næstunni meðan litla daman mín er ekki heima. Talaði við hana í dag og hún er bara voða sátt og enn að bíða eftir systkininu. Jæja þá kveð ég að sinni!!! Drabban

Tilviljanir eða ekki!!

2007-10-24T22:06:00.000Z

Reykingar eru hættulegar!!! til eru beinar og óbeinar en hvað skildi það kallast með þessi gaur er að gera??? Annars er lítið að frétta héðan nema það rignir og rignir og það er rok og rok. Maður gerir lítið annað en að hanga inni. Skvísan komin á Skagann, fór víst á fótboltaæfingu í dag!!pabbi hennar er eitthvað að láta sig dreyma um að hún verði í landsliðinu þegar hún verður stór. Sé dramadrottninguna ekki alveg fyrir mér í því en hver veit. Hún hefur upphafsstafina Í.A. (Ó) og fór á æfingu með Í.A!!! Sumir vildu meina að pabbi hennar hefði fengið að ráða nafninu en það var ég sem stakk upp á því. Hún var með gulu þegar hún fæddist og með svart hár. Svartur og gulur eru jú litir Í.A þannig að kannski er henni ætlað að spila fótbolta á Skaganum. Tilviljanir eða ekki!! Farin að glápa á imbann! kveðja Drabban

Músin mín farin í bili!!!

2007-10-23T21:51:00.000Z

Jæja þá er litla skellibjallan mín farin á Skagann. Hún fór til pabba síns og Siggu (stjúpu) til að vera í svoldin tíma. Hún fór að taka á móti litla systkyninu sem hún er að fara að eignast fljótlega (vonandi). Það er áætlað þann 1.nóv. Hún er bara búin að vera að bíða eftir þessu síðan í sumar þegar henni var sagt að hún væri að verða stórasystir. Ég er alls ekki vön því að hún fari í lengri tíma frá mér en ég verð að herða mig og reyna að njóta tímans vel. Kannski ég geri eitthvað sem ég geri vanalega ekki þegar hún er hjá mér. Tek kannski fram gítarinn og slæ á nokkra strengi. Mér er boðið í 30. afmæli hjá Júllu vinkonu um helgina og ég ætla að eyða svoldnum tíma með henni fram að helgi og hjálpa henni að gera klárt fyrir herlegheitin. Annars verður bara á næstunni legið í dvd og reynt að bæta sér upp dvd leysið. Ég er orðin voða löt við að horfa á eitthvað. Sofna helst áður en 10 mínútur eru liðnar. Annars er ekki mikið í fréttum héðan af Congo. Engar fréttir hljóta að vera góðar fréttir!! Er þá ekki bara best að drattast í háttinn og setja eina dvd í tækið til að sofna yfir!! Kveðja Drabban

Bling bling!

2007-10-18T16:49:00.000Z

Jæja ætli það sé nu ekki komin tími til að skrifa hér inn. Helgin síðasta var alveg dásamleg. Við Júlla brunuðum af stað til Reykjavíkur á fimmtudaginn eftir vinnu þó svo að spáin væri ekki neitt spes. Það var í lagi með veðrið engu að síður fyrir utan smá rok við Vík. Við komum til Ölfu um 11, fórum eiginlega bara beint að sofa þar sem við vorum hálf þreyttar eftir keyrsluna. Ég fór svo í klippingu á föstudagsmorguninn á meðan Júlla fór til læknis. Síðan kíktum við aðeins í búðir og brunuðum svo til Keflavíkur þar sem Kristjana tók á móti okkur. Um kvöldið var tappinn tekinn úr hvítvíninu og farið í náttbuxurnar og hlýrabolinn og hellt sér í kósíheitin. Það var ekkert smá kósí hjá okkur og kvöldið æðislegt í alla staði!! Það kíktu nú einn og einn af vinum hennar í heimsókn og þau voru öll svo skemmtileg að það var sko ekki til að skemma. Við útbjuggum svo smá rétt fyrir afmælisveisluna sem var á laugardaginn. Laugardagurinn var æðislegur líka. Afmælið var svo haldið í sal í miðbænum. Þvílíkar kræsingar og það var fullt af fólki sem mætti en við þekktum nú ekki marga. Siggi og Teddi voru þar og við þekkjum þá og svo var Maggi Tóka sem er kærasti vinkonu Kristjönu og ég kannaðist svoldið við hann síðan ég bjó í bænum. Hann bara bjargaði kvöldinu fyrir okkur. Hann reitti svo af sér brandara og við lágum úr hlátri. Kristjana byrjaði á því að draga okkur Júllu upp til að taka lagið með sér og vinur hennar spilaði undir á gítar. Þegar afmælið var að enda og staðurinn að opna fyrir almenning kíktum við Júlla aðeins á pöbbarölt en við höfðum svo sem ekki mikið út úr því. Það má nú segja að Keflavík sé orðið undirlagt af pólverjum!!! við vorum víst allt of snemma á ferðinni því það gildir víst þarna að pólverjarnir fara snemma á djammið og djamma flestir til svona 1-2 en þá fara íslendingarnir á rallið!! við nenntum nú ekki að bíða eftir þeim. Heilsuðum upp á Unnar og Ínu og drifum okkur svo heim að sofa. Við áttum svo kósístund með Kristjönu á sunnudeginum áður en við rúlluðum okkur af stað austur. Þetta var yndisleg helgi í alla staði. Nema að þegar við vorum að koma út úr göngunum við Almannaskarðið þá var bíll á undan okkur út og gaf svo stefnuljós og beygði en náði ekki beygjunni og kastaðist útaf. Okkur brá hrikalega og hentumst út úr bílnum til að athuga hvort ekki væri í lagi með þá sem voru í bílnum. Jú út stigu þrír 17 ára strákar frá Höfn og allir ómeiddir fyrir utan smá eymsli í bringunni eftir öryggsibeltin. Höggið var það mikið að loftpúðarnir báðum megin fram í sprungu út. Við biðum með þeim þar til þeir voru sóttir og löggan búin að spyrja okkur út úr. Sá sem var að keyra var búin að vera með próf í viku, en hann var alls ekki að keyra hratt eða neitt slíkt, bara náði ekki beygjunni. Við skiluðum okkur heim um 10. Vikan er svo búin að líða ótrúlega hratt. Starfsdagur í vinnunni á morgun. Auður ætlar að taka fyrir mig ungann minn og passa á meðan. Svo ætla ég bara að njóta helgarinnar. Gera ekkert sérstakt. Jæja ætli ég hætti ekki bara að blaðra og fari í íþróttafötin þar sem ég er að fara í badminton í fyrsta skipti í langan tíma. Kveðja Drabban

Keflavík tomorrow

2007-10-10T18:00:00.000Z

Þetta tré er H.C Andersen tréið sem er í Danmörku. Í þetta tré eru skorin út persónur úr ævintýrum H.C. Andersens. Þetta er ekk alveg nógu góð mynd til að sjá nákvæmlega hvað er skorið út í tréið en þar sem þessi mynd er tekin út úr glugga á bíl, nánast á ferðinni, en þeir sem ætla að ferðast um Danmörku gætu sett þetta á listann yfir þá staði sem á að skoða.

Annars erum við Júlla að leggja í hann eftir vinnu hjá mér á morgun, ekkert spes spáin, en við látum ekkert stoppa okkur. Gistum hjá Ölfu systur eina nótt og förum svo á föstudaginn til Keflavíkur.

Þar sem ég reikna ekki með að rita meira hér inn fyrir helgina þá ætla að nota tækifærið og segja

TIL HAMINGJU MEÐ AFMÆLIÐ ELSKU EYDÍS MÍN Á MORGUN ÞANN 11!

Ég ætla bara að vera stuttorð núna, þarf að spara mig fyrir Júllu og ferðina okkar suður því þurfum svo sannarlega að getað spjallað saman. Ég hef samt engar áhyggjur að við verðum eitthvað uppiskroppa með umræðuefni! Annars segi ég bara snemma Góða helgi. Kveðja Drabban

Lítill kroppur með stóra fætur!

2007-10-08T19:34:00.000Z

Eru þetta ekki full stórir fætur á svona lítinn kropp!! Allt gott að frétta. Einhver uppsöfnuðu þreyta í gangi. Hef yfirleitt farið að sofa um 11 en síðustu viku og enn í gær þá hef ég ekki komið mér í koju fyrr en um 1 og það er allt of seint fyrir mig þar sem ég þarf alveg 11 tíma svefn! Spurning um að fara mjög snemma að sofa í kvöld. Ekki veitir af að safna orku fyrir næstu helgi þar sem ég er að fara til Reykjavíkur og til Keflavíkur ásamt Júllu vinkonu. Það verður ekki gefið alveg strax upp hvað við erum að fara að gera en ég er samt að fara í klippingu á föstudaginn á Soho! Komin með svakalegann lubba! Hárbandið eina sem dugar. Það er alveg skítkalt hér en alveg glampandi sól og fallegt veður og það var alveg fullt af fólki í gönguferð seinnipartinn. Jæja kveðja í bili Drabban

2007-10-07T23:32:00.000Z

Þá er það á hreinu að haustið er komið. Þvílíkur skítakuldi!!! En ég skellti mér á djammið í gær !!! Það fer að verða fréttnæmt dæmi því ég er orðin svo löt við þetta. En Malin og Jón Einar voru að spila milli 10 og 12 og ég mætti upp úr 10. Það var mjög gaman. Ég fékk mér smá öllara en ekkert mikið. Endaði kvöldið á rúntinum til 5 í morgun. Var bara með steiktu fólki en skemmti mér voða vel. Það er ekki hægt að segja annað en að ég hafi alveg fundið fyrir því að ég var að djamma í gær. Ekkert slæmt samt en ég hafði það allavega af að fara í 5ára afmæli til hennar Hafrúnar frænku minnar. Annars fór dagurinn í tiltekt og skipulag, endur skipulagði í alla 18 eða eitthvað kassana mína. Fæ aldrei nóg af því að skipuleggja!!! En þessi mynd sem fylgir með er tekin í gönguferð út í Æðarsteinsvita í fyrravor. Sá þennan litla álf út úr hól og gat ekki annað en smellt mynd af honum. Kveðja Drabban

2007-10-06T14:09:00.000Z

Já svona eru hlutirnir einfaldir í Kína! maður þarf lítið sem ekkert að hafa fyrir því að skipta á krökkum. Engin fyrirhöfn að rífa þau úr að neðan til að ná bleiunni. Nei bara haft opið bleiusvæðið á fatnaði barnanna!!! Hér er kannski ekki alveg verið að hugsa um útlitið, en sniðugt engu að síður.

Þessa mynd tók mamma í apríl þegar hún var í Kína. Annars er það plan dagsins að gera sem minnst en kíkja svo á barinn í kvöld og hlusta á Malin og Jón Einar spila. Afmælisbarn dagsins er hún Heiða!! Til hamingju með daginn vinkona!!! 26 ára í dag. Kveðja Drabban

Home sweet home

2007-10-05T13:32:00.000Z

Jæja! þá er að virkja sig aftur í skáldskapinn! Fréttir!! engar merkilegar. Búin að fara tvisvar til Reykjavíkur í lækniserindi, annað fyrir mig og hitt fyrir Írisi . Það var engin leið að fá tíma fyrir okkur á sama tíma sem þýddu tvær ferðar suður. Ekki það ódýrasta að sendast svona en með góðri hjálp hjá Visa þá tókst þetta þó eftirköstin verði einhver(þegar vísareikningurinn kemur). Ég keypti mér bíl um daginn! loksins kannski. Mér hefur kannski ekki hingað til vantað bíl en svo kom svona þörf fyrir að eiga slíka.Mamma verður fyrir sunnan eitthvað á næstunni sem þýðir það að ég hefði verið bíllaus og það er ekkert skemmtilegt þegar maður á krakka sem er óendanlega lengi að koma sér út úr húsi á morgnana. Hefði bara verið ávísun á seina mætingu í vinnu á hverjum degi. En nú þarf ég ekki að hafa áhyggjur af því lengur. Ég keypti mér Subaru Legacy, sedan hvítan samlitann. Mjög flottur nema hann er ekki á neitt sérstökum felgum. Ég leitaði um allt í bænum af álfelgum sem mig langaði í en ég fann engar. Læt þessar duga út veturinn og fæ mér nýjar fyrir sumarið. Annars er allt gott að frétta, er að fara að halda snyrtivörukinningu hjá mér í dag klukkan 5. Krissa kemur með vörur frá Avon og ég hóa í lið. Mjög góðar vörur á litlu verði. Ég er heima í dag, Íris var lasin í nótt og er hálf ræfilsleg í dag en hún er öll að koma til. Mér leiðist það afskaplega að hanga heima þegar ég veit að ég á að vera í vinnunni en það er víst ekkert við því að gera! En jæja kannski maður fari að finna sér eitthvað að gera! Kveðja Drabban

p.s það verður svona þema hjá mér á blogginu að henda inn ýmsum myndum annað slagið!!

myndatilraun

2007-10-03T22:21:00.001Z

ég var nú bara að athuga hvort það væri hægt að setja inn myndir hér á þetta blogg þar sem það var ekki að gera sig á því gamla. kveðja Drabban

Gafst upp á gamla blogginu

2007-10-03T21:43:00.000Z

Jæja ætli það sé ekki best að gera tilraun til að blogga á nýjum stað þar sem hitt bloggið er farið í hundana og skilar ekki neinum texta inn. Nú er að sjá hvernig þetta stendur sig já og líka hvernig bloggarinn sjálfur stendur sig eftir svona langa pásu!!!!